Conciertu íntimu del dúo norteamericanu The Mastersons nel Palaciu Valdés

El sábadu 14 de xineru, a les 21:00 hores, dientro de la so xira europea, hai una cita col conciertu íntimu del dúo norteamericanu The Mastersons nel Teatru Palaciu Valdés.

La xira española del dúo norteamericanu The Mastersons va tener una parada bien especial n’Avilés el próximu 14 de xineru. N’actuando en Valencia, Zaragoza y Madrid con un formatu clásicu de banda, con batería y baxu, Chris Masterson y Eleanor Whitmore van salir a les tables del Teatru Palacio Valdés ensin más compañía que les sos guitarres acústiques y les sos voces, nun conciertu íntimu nel qu’esperen crear una atmósfera de cercanía col públicu avilesín.

The Mastersons atopase na so xira europea presentando’l so segundu álbum, “Good Luck Charm”, una colección de cantares de pop-rock con arume country qu’esprende positividad y dulzura, un sellu propiu del dúo texanu. La pareya adelantró en delles entrevistes que’l conciertu d’Avilés va ser una ocasión especial non yá pa tocar los cantares de “Good Luck Charm” y del so primer llanzamientu, “Birds Fly South”, sinón tamién p’adelantrar a los sos siguidores dalgunos de los cantares que dan forma al que va ser el so tercer discu, que va salir a la vienta en mayu sol títulu de “Transient Lullaby”.

Chris Masterson y Eleanor Whitmore cunten con reconocíes trayectories dientru del panorama del pop-rock y country norteamericanu. N’entamando carreres musicales en solitariu, con proyectos como Eleanor´s Airplanes o Chris The Llate Great Chris Masterson, la so relación sentimental y la so afinidá musical lleváronlos a fundar The Mastersons. Na actualidá son amás miembros de The Dukes, la banda d’acompañamientu de Steve Earle.

El formatu del conciertu d’Avilés va dexar al dúo “cuntar más hestories ya inclusive a prescindir del setlist y tocar lo que nos pruyir nesi momentu, cosa que nun puedes faer cuando toques con otros músicos que nun conocen tol to repertoriu”, según ellos mesmos aseguren.