‘Lava’ de Fernando García algama’l I Premiu de Relatos del Ayuntamientu Villaviciosa

Fernando García González, mozu xixonés, llicenciáu en Ciencies del Mar, amosóse esti día bien d’emocionáu pol premiu, al qu’optó con “Lava”, un relatu dedicáu a la memoria de Katia y Maurice Krafft, dos vulcanólogos franceses pioneros en fotografiar y filmar volcanes, que finaron demientres trabayaben nel monte Unzen, en 1991, en Xapón. 

El xuráu, compuestu por Inmaculada Rodríguez, Pablo Solares y Pilar Tuero quixo destacar de “Lava” la so orixinalidá, tantu a nivel estructural como en creatividá lliteraria, y valoraron la sensibilidá del autor al tratar temes universales, como l’esperecimientu o l’amor. El premiu tien una dotación económica de mil euros.

Al concursu presentáronse 230 autores, d’Asturies y del restu d’España. Tamién fueron recibíos relatos d’otros países, como Arxentina, Israel o Italia. Les bases esixíen relatos orixinales ya inéditos con una estensión de 4 a 6 folios.

Amás del relatu ganador, el xuráu escoyó les siguientes obres, a les que concede una Mención Honorífica por tal condición d’escoyíes, ·

• UNA RAYADA, de Mª JESÚS ANDRÉS MIGUEL
• PINIELLU, de JESÚS MARTÍN RODRÍGUEZ
• EL LAVATORIO, de SALVA SEPÚLVEDA GUTIÉRREZ
• EL SILENCIU, de MARÍA BELLIDO VARGAS
• DEL VIVIR CENICIENTU, de JAVIER IZCUE ARGANDOÑA
• L’ABSURDU, de MIGUEL LIZONDO MARTÍNEZ

La convocatoria d’esti nuevu premiu tien por oxetivu’l fomentu de la participación cultural, sofitando nesti casu la creación lliteraria, ya enxértase nel Plan estratéxicu de subvenciones 2016 del Conceyu de Villaviciosa, dientro d’área de Cultura.