Carabanzo celebra una fiesta astur-romana con música de La Bandina, La Col.lá Propinde y Dixebra

Carabanzo va celebrar esta fin de selmana la primer fiesta astur-romana, na que se van revivir los enfrentamientos ente asturnes y romanos qu’hai sieglos hubieron dase na ruta de La Carisa, ente los conceyos d’Ayer y de L.lena. Col escritor Dolfo Camilo Díaz como pregoneru de les fiestes, la nueche del prósimu día 12 va vivir un momentu especialmente asturianu cola música del gaiteru Saúl Quiñones, y l’actuación de La Bandina, Dixebra y La Col.lá Propinde.

El programa previstu pa esti singular festival, va camudar Carabanzo nun pobláu astur qu’a lo llargo de la fin de selmana va ser atacáu poles tropes imperiales romanes nel so avance pela vía Carisa, recreando asina una hipotetica llucha ente los guerreros astures de Segeo y los lexonarios unviaos por Augusto baxo’l mandu de Publio Carisio.

Tres d’una ruta en bicicleta pela Vía Carisa, el día 12 d’agostu va abrise’l pobláu y mercáu astur, con una esposición sobre l’enclave hestóricu astur-romanu. Una llucha de guerreros y una boda astur, amás del citáu pregón a cargu de Dolfo Camilo Díaz, va completar un primer día festivu que va rematar cola Nueche Astur na que van actuar los grupos La Bandina, Dixebra y La Col.lá Propinde.

El domingu día 13 d’agostu habrá tamien lluches de gladiadores y obres de teatru romanes pa neños, amás d’otres actividaes rellacionaes col enclave arqueolóxicu de La Carisa. D’esta manera, cola collaboración de Caxastur y l’apoyu de la Conseyeria de Cultura del Gobiernu del Principáu d’Asturies, l’Agrupación de Mozos de Carabanzo organiza esta primer fiesta astur-romana nel envís de que se vuelva una de les principales atracciones turístiques del conceyu, teniendo l’enclave de La Carisa y les sos ayalgues arqueolóxiques como protagonistes y escusa pa un encuentru de calter lúdicu qu’al tiempu esparda les investigaciones que se tán faciendo sobre la Vía Carisa.