Cáceres axunta a Goya, Picasso y Weiwei nun nuevu muséu

Una primer edición de Los Caprichos que Goya regaló al so amigu Evaristo Pérez de Castro y una enorme llámpara del chinu Ai Weiwei enllacen el meyor arte español de sieglos tras col más internacional y contemporaneu nel nuevu Muséu Helga Alvear de Cáceres.

De la mesma, l’edificiu qu’alluga esti nuevu muséu, obra de Tuñón Arquitectos y aspirante al Premio Mies Van der Rohe, xune la parte antigua y l’enanche de la ciudá estremeña, qu’agora queda más cohesionada. Los Reis inauguraron la selmana pasada esti nuevu centru, que ye unu de los pocos abiertos n’Europa en plena pandemia, tres la so presentación el día antes al cargu de la coleccionista a quien se debe, del arquiteutu Emilio Tuñon y del comisariu del proyectu espositivu inicial y conservador de la colección De Alvear, José María Viñuela.

El Muséu, dedicáu al arte contemporaneo y onde s’inclúi a Goya como “gran referencia del arte moderno y actual”, contién unes 200 de les más de 3.000 obres qu’atesora la galerista d’orixe alemán considerada como una de les colecciones privaes más importantes ente les formaes n’Europa nos últimos años. Picasso, Kandinsky, Olafur Eliasson, Louise Bourgeois o Doris Salcedo son otros de el autores representaos nel nuevu espaciu, onde predominen les obres de gran formatu. La mayoría d’elles nun s’habíen vistu agora n’España, sorrayó la mesma coleicionista.

El centru ocupa 8.000 metros cuadraos, incluyíu un xardín con espaciu espositivu. L’edificiu consta de cuatro llantes y conecta la parte antigua de Cáceres pola cai Pizarro col enanche urbanu al traviés de la de camín Llanu. D’esa manera la institución refuerza la cohesión de la ciudá y arriquecer” con una relevante ufierta cultural. La edificación de nueva planta del muséu, realizada nos postreros cinco años con una inversión de 10 millones d’euros, constitúi la segunda fase d’un vastu proyectu empecipiáu nel 2005 col concursu pa la rehabilitación de la Casa Grande de Cáceres, antigua casona d’indianos y güei en manos de la Xunta d’Estremadura. Los sos 3.000 metros cuadraos destináronse, nesa primer fase rematada nel 2010, al Centru d’Artes Visuales de la Fundación Helga de Alvear.