Bryan Adams ataya un conciertu en Mississippi pola llei antigay

El roqueru canadiense Bryan Adams atayó’l conciertu que tenía previstu pa esti 14 d’abril nel Mississippi Coast Coliseum de Biloxi como protesta contra una llei que va contra los derechos del colectivu LGBT.

Concretamente, tratase de la llei de Llibertá Relixosa que va dexar a los negocios, persones individuales y organizaciones relixoses refugar los sos servicios a persones gais, madres solteres o cualesquier que pudiera “ofender a daquién que tenga una sincera creencia relixosa”. Nun comunicáu nes redes sociales, Adams plantega qu’esta llei ye “incomprensible” y que él nun puede “en bona conciencia actuar nun Estáu onde a ciertes persones niéguense-yos los sos derechos civiles pola so orientación sexual”.

“Usando la mio voz solidarizo con tolos mios amigos LGBT pa repeler esta norma desaxeradamente discriminatoria. Espero que Mississippi recapacite y pueda volver p’actuar pa los mios munchos fans. Espero esi día”, aprofió’l músicu.

Esta decisión de Adams llega apenes dos díes depués de que Bruce Springsteen atayara un conciertu en Carolina del Norte pa protestar contra la llei del cuartu de bañu: “Esta llei dicta qué cuartos de bañu tienen dexar d’usase peles persones transxénero.

Tamién ataca a los ciudadanos pertenecientes al colectivu LGTB torgando que demanden cuando los sos derechos son violaos nel llugar de trabayu. Al mio xuiciu, ye un intentu de xente que nun puede soportar el progresu del nuesu país”, defendió Springsteen.