Avlés anuncia un centru de FP nuna parcela de La Grandiella

L’alcaldesa d’Avilés, Mariví Monteserín,  anunció esti día que’l Gobiernu d’Asturies va construyir un nuevu Centru Integráu de Formación Profesional n’Avilés, en concretu n’una parcela municipal  que’l Conceyu tien en La Grandiella.

El presupuestu autonómicu aprobáu inclúi una partida xenérica venceyada a la Dirección Xeneral de Formación Profesional que va dexar encargar la redacción del proyectu en 2021. Tratase d’una parcela d’equipamientu públicu xenéricu de 7.101 metros cuadraos na cai El Barrial, que va ser vencida al Principáu d’Asturies.

La idea ye qu’esti nuevu centru, que va tener 13 llínees formatives y 30 aules-, acueya les especialidaes de servicios qu’agora s’imparten nel CIPF Avilés, de manera que esti edificiu gane espaciu para la formación industrial y poder responder asina a la demanda de matrícula qu’atropen estes especialidaes formatives.

L’alcaldesa realizó esti anunciu nel intre de la rueda de prensa de valoración del conteníu de les cuentes asturianes no que cinca a Avilés que, na so opinión, “dan salida a problemes d’Avilés que yera necesariu resolver” anque reconoció que “los presupuestos, da igual de qué alministración sían, nunca satisfaen tolo que quixéramos”. Destacó la importancia d’empecipiar les obres de reforma del interceptor del Ríu San Martín para resolver los riesgos d’hinchentes na glorieta de Los Oficios y la cai Llanu Ponte. Aseguró que “vamos tar bien enriba por que sala adelantre y tea terminada en 2022”.

Más información