Avilés va reconocer con un diploma’l comportamientu de la reciella mientres el confinamientu

Les families d’Avilés pueden unviar el nome y apellíos de los menores de 13 años a juventudaviles.es porque van recibir un diploma na so casa pa celebrar el  comportamientu de la reciella mientres el confinamientu. Na distinción, l’alcaldesa  Monteserín reconoz “l’actitú exemplar, escelente comportamientu y destacada valentía” que tuvieron los y les menores.

L’alcaldesa, Mariví Monteserín, en nome de la ciudá quier estimar l’actitú exemplar que tuvieron los neños y neñes d’Avilés nesta situación escepcional que tamos viviendo pola crisis sanitaria del Covid-19. Por eso, va reconocer con un diploma personalizáu a los y les menores de 13 años que les sos families entiendan qu’el so comportamientu ye merecedor de tal galardón. Al traviés de la dirección juventudaviles.es, les families van faer llegar el nome y apellíos del neñu o neña xuntu cola so dirección postal, y van recibir el diploma na so casa, robláu pola alcaldesa.

L’actual crisis sanitaria dio llugar a una situación escepcional que supunxo un gran esfuerzu pa tola ciudadanía y que tresmanó fondamente los vezos y forma de vida de toos y toes.

Los neños y neñes demostraron una actitú exemplar, escelente comportamientu y destacada valentía mientres un confinamientu que tuvo de resultes fuertes restricciones. Esto foi fundamental pa faer frente al coronavirus y contribuyir a la protección de la salú de les persones que viven n’Avilés. Por eso, Mariví Monteserín considera que “ye importante que dientro d’unos años ellos, los más nuevos, tamién puedan recordalo y siéntanse partes de faer frente a una crisis sanitaria que punxo pates arriba la nuesa manera de vivir y rellacionanos y de la que solo se puede salir xuntos con responsabilidá y solidaridá”.

Los diplomes van unviase  a los menores de 13 años, aplicándose asina la franxa d’edá qu’estableció’l Gobiernu pal tratamientu de los neños y les neñes nes midíes contemplaes na declaración del Estáu d’Alarma p’atayar la crisis sanitaria.