Avilés estrena’l so primer Festival de Teatru Clásicu

Avilés estrena’l so primer Festival de Teatru Clásicu, n’homenaxe a Bárganos Candamo cn representaciones esti xueves 26 y el vienres 27 na plaza de Camposagrado.

El cartelu inclúi “Entremeses Risibles” y “De Pícaros y Arlequines”. Una propuesta qu’afonda na vinculación d’Avilés cola creación teatral, entamada pola conceyalía de Cultura y Promoción de Ciudá y la compañía local Arte Producciones José Ricu Teatru. Últimes entraes disponibles pa dambes representaciones en www.invitacionesavilescultural.es.

El Festival de Teatru Clásicu d’Avilés “Bárganos Candamo” quier ser una celebración en plenes Fiestes de San Agustín de la relación d’Avilés coles artes escéniques, una esaltación de les obres del Sieglu d’Oru a partir d’unu de los sos autores clave, nel escenariu de la plaza de Camposagrado. Dos funciones, el xueves 26 y el vienres 27 d’agostu, a les 22.00 hores. Ante uno de los más maxestosos palacios del barrocu n’Asturies, el públicu va poder esfrutar de los espectáculos los “Entremeses Risibles” y “De Pícaros y Arlequines”, gracies a la propuesta de la conceyalía de Cultura y Promoción de Ciudá d’Avilés y la compañía Arte Producciones José Ricu Teatru.

El festival naz de la posibilidá d’amontar la ufierta cultural d’un Avilés destino turísticu, d’aprovechar como escenariu unu de los cascos antiguos meyor calteníos y más estensos d’Asturies, y de proclamar que la ciudá cunta col privilexu de ser trubiecu d’unu de los postreros representantes del Teatru Áulico del Sieglu d’Oru.

Con un nexu común ente pasáu, presente y futuru del especial venceyu de la ciudá col teatru, y dende una perspectiva encontada na creación y la calidá, col impulsu d’una compañía d’Avilés con solera, Arte Producciones José Ricu Teatru, encargada, por casu, de conducir les visites teatralizadas al Palaciu Valdés.

“Entremeses Risibles”, xueves 26 d’agostu

A partir de los entremeses risibles “L’astrólogu tunante” y “Entremés de les visiones”, dos pieces risibles de Bárganos Candamo que se complementen cola incorporación d’escenes d’otros grandes autores del Sieglu d’Oru, como Tirso de Molina, Lope de Vega, Calderón de la Barca y Cervantes, amás de testos del propiu José Ricu.

La dramaturxa amuesa, en clave de farsa risible, o farsa estrema, el microcosmos de la dómina, especialmente centráu nes relaciones afeutives y amatorias. El públicu va poder comprobar que nun falten tanto de les actuales.

La repartida ta conformáu por Natalia Suárez, Ana Blanco, Ánxeles Corderu, Vanessa Estraviz, Enrique Dueñes, Joaquín Menéndez, Fran Roldán, Diego Rodríguez, Juan Mortera, Kike Carragal, Ángel Cuesta y José Ricu.

La dirección, l’adaptación y la dramaturxa lleven la firma de José Ricu, con aportaciones de creación colectiva, especialmente na parte musical, que cobra una gran relevancia nel desenvolvimientu de la trama.

“De Pícaros y Arlequines”, vienres 27 d’agostu

Un percorríu pola picaresca española so la óptica de la Commedia dell’Arte, estableciendo paralelismos ente personaxes d’ésta y los que pueblen un xéneru lliterariu tan español. Asina, pueden atopase na picaresca personaxes asimilables a los arlequines, capitanos, zannis y demás, qu’obedez a la lóxica del paralelismu ente les sociedaes italiana y española naquella dómina.

La función reflexa una sociedá aprobetada pola guerra y otres causes. Numberosos individuos lluchando por sobrevivir nuna redolada contraria. Tiempu de fame y necesidá estremes qu’obliguen a aguzar l’inxeniu p’ameyorar d’estáu y alimentase nun sistema de clases estamental tan ríxidu y opresivo.

La repartida ta conformada por Natalia Suárez Ríos, Ánxeles G. Corderu, José Ricu, Fran Roldán y Joaquín Menéndez.

La dirección, l’adaptación y la dramaturxa son de José Ricu.

Últimes entraes disponibles en www.invitacionesavilescultural.es