Portada Conceyos La Vega acueye n’Uviéu LINK: esperiencies culturales insólites y gratuites

La Vega acueye n’Uviéu LINK: esperiencies culturales insólites y gratuites

by asturnet

La Vega acueye, dende esti vienres 27 al domingu 29 d’agostu , LINK: esperiencies culturales insólites y gratuites.

El conceyal y presidente de la Fundación Municipal de Cultura, José Luis Costillas y el director artísticu del ciclu, Jose Castellanos presentaron esta selmana la segunda edición del circuitu 3.0 d’Uviéu, que se va celebrar na Fábrica d’Armes. La entrada ye llibre hasta completar aforu y nun ye necesariu retirar invitaciones.

LINK vuelve a la Fábrica de La Vega colos llinguaxes artísticos más avanzaos. El Circuitu d’Esperiencies Culturales Insólites d’Uviéu va acoyer na so segunda edición producciones musicales, instalaciones artístiques y esperiencies de realidá virtual, realidá aumentada y Cinema 360º. La cita ye del 27 al 29 d’agostu na Fábrica d’Armes de La Vega. LINK volverá ufiertar al públicu d’Uviéu una programación híbrido y múltiple, alternando lo lúdico y lo artístico.

Dende esti vienres 27, aseguró Costillas, “n’Uviéu vamos tener la oportunidá d’esperimentar sensaciones inédites, d’enfusanos nel mundu de la realidá virtual y asistir a conciertos totalmente distintos a los que tamos acostumaos a tener na nuesa ciudá. LINK ye un festival híbridu, inclasificable, sorprendente, con  un formatu que viaxa del muséu d’arte moderno al parque d’atracciones, qu’alterna lo lúdico y lo artístico y que nun  dexa a naide indiferente. Esta fin de selmana, de vuelta de vacaciones yá pa munchos, n’Uviéu vamos tener la oportunidá de vivir esperiencies como somorguianos nun océanu de criatures marines fantasmales poniéndonos unes gafes de realidá virtual, vamos poder enfusanos nel Covarón de los Vampiros, asistir a un conciertu de folktrónica, que funde Galicia y l’Asturies, ver escultures de realidá aumentada al traviés de los nuesos dispositivos móviles o aprender de les Hestories y la Fábrica al traviés de relatos d’aventures lliteraries….”

Nesta edición, el cartelu musical inclúi nomes internacionales como la inspiradora BABii o’l multidisciplinar Kai Whiston, y el gallegu Baiuca, referente mundial de la folktrónica. Esti circuitu d’esperiencies 3.0 que va cerrar la programación braniza de la Fundación Municipal de Cultura d’Uviéu combina artistes consolidaos (Michael Frey, Lauren Moffatt, Jonathan Notariu) y talentos emerxentes, amás d’esquizar la disolución de les fronteres ente ceadores y receptores al traviés de la participación ciudadana.

Toles actividaes del LINK son gratuites, con aforos llindaos. La entrada a la Fábrica d’Armes de La Vega ye llibre hasta completar aforu. Una vegada ellí, el públicu tendrá d’apuntase a les actividaes de realidá virtual, realidá aumentada y Cinema 360º. Les puertes de los conciertos van abrise 40 minutos antes del entamu de #cada conciertu.

Los horarios del LINK son los siguientes:
27 d’agostu | 16:30 a 23:00
28 d’agostu | 11:30 a 15:00 y 16:30 a 23:00
29 d’agostu | 11:30 a 15:00 y 16:30 a 21:30

Tamién te podria gustar