Avilés entama l’alcuentru de la Rede Temática “Modelos de Trabayu Cooperativu”

El 30 de payares celebrase’l Día Internacional de la Ciudá Educadora y pa conmemoralo, la conceyalía d’Educación d’Avilés, que forma parte de la Rede Estatal de Ciudaes Educadores dende hai 21 años, programó una serie d’actos, ente ellos la organización del alcuentru de los conceyos integrantes de la rede temática que coordina, “Modelos de trabayu Cooperativu: Re-Acción d’una ciudá Educadora”.

Esti alcuentru desenvuélvese dende ayeri xueves nel Palaciu de Valdecarzana. Una xunta na que tan participando les localidaes de L’Hospitalet de Llobregat, Palma, Sant Just Desvern, Tarragona y Vitoria-Gasteiz. El restu de ciudaes xuntaes a esta rede van poder conectase de forma telemática, como yá se fixo na xunta inaugural, que tuvo llugar n’avientu del 2020.

Esti vienres pela mañana los participantes van ser recibíos de forma oficial nel Conceyu pola concejala d’Educación d’Avilés, Nuria Delmiro (10.00 hores), y van asistir, al pie de l’alcaldesa, Mariví Monteserín, al actu d’entierru de la Cápsula del Tempo iguada polos neños y neñes de 18 centros educativos de la ciudá (11.00 hores), nel Parque de La Ferrera.

Pela tarde, les ciudaes van cerrar el documentu final de la rede temática, y van entamar la presentación de la rede nel XV Alcuentru de la Rede Estatal de Ciudaes Educadores, RECE, que va tener llugar en Vitoria el 17 y 18 de marzu de 2022.

Avilés impulsa y coordina esta rede temática, qu’integren Sant Joan D’Alacant, Algete, Sevilla, Peligros, Lloret de Mar, Sagunto, Medina del Campu, L’Hospitalet de Llobregat, A Coruña, Santa Perpètua de Mogoda, Tarragona, Palma, Villena, Dos Hermanes, Rivas Vaciamadrid, Mislata, Quart de Poblet, Sant Just Desvern, Sant Cugat del Vallès, Chiclana, Sant Feliu de Llobregat, Paterna y Vitoria-Gasteiz.