Avilés apuesta pola música col Palaciu Valdés y la Factoría Cultural como escenarios

El Conceyu d’Avilés va reforzar la programación musical de la ciudá col Teatru Palaciu Valdés y la Factoría Cultural como escenarios principales. Enagora, tán zarraos 8 conciertos, que se sumen a los dos yá celebraos de The Mastersons y Maika Makovski, y el de Leather Boys que van actuar esti sábadu 4 de febreru na Factoría Cultural.

L’oxetivu, según la conceyala de Cultura, Yolanda Alonso, ye “ufiertar non yá al públicu d’Avilés, sinón al de toa Asturies y provincies averaes, grupos y estilos hasta agora non habituales na programación musical”.

Destacó’l ciclu “Factoría Sound”, con 5 conciertos yá confirmaos y que tien la vocación de convertise nun referente n’Asturies y el norte d’España para tolos estilos musicales, como’l rock, soul, funk, blues, jazz o rap, a semeyanza de la que yá ufierten ciudaes como Vitoria o Bilbao.

Pela so parte, Delta Saints y The Handsome Family confirmaron tamién la so presencia n’Avilés con conciertos nel Teatru Palacio Valdés los díes 26 de marzu y 4 de mayu, respectivamente.

Ver programación