Portada Educación Asturies va ser de les que más se beneficie del desenvolvimientu la educación universitaria

Asturies va ser de les que más se beneficie del desenvolvimientu la educación universitaria

by redacción asturnews
Foto: Hugo Pardo Kuklinsk (https://www.flickr.com/photos/18016623@N00/)

Un estudiu de la Universidá d’Uviéu cuantifica l’impactu de la educación superior sobro la crecedera económica de les rexones y darréu d’ello asitia a Asturies ente les comunidaes que más beneficiu económicu va recoyer.

La investigación, publicada en ‘Rexonal Studies’, revela qu’una medría d’un 10% nel númberu d’universitarios xenera una crecedera del 0,12% nel productu interior brutu per cápita de les comunidaes autónomes. L’estudiu ta realizáu por Juan Francisco Canal Domínguez, profesor de la Área de Fundamentos del Analís Económicu de la Universidá d’Uviéu,  y acaba de ser espublizáu na revista Rexonal Studies’, apurriendo amás la novedá de que les resultancies llograes difieren ente rexones en función de les sos particularidaes socioeconómicas.

El papel de la educación cimera revélase como un importante preséu de cohesión social y al arrexuntar les comunidaes autónomes en función de la so riqueza, l’estudiu indica que la medría del númberu d’universitarios xeneraba un aumentu del 0,81% nel productu interior brutu per cápita de les comunidaes más probes frente al 0,65% de les más riques, lo que contribúi a amenorgar les diferencies económiques interterritoriales.

Acordies con esta investigación, Asturies, al asitiase dientro del grupu de comunidaes autónomes con un PIB per cápita inferior a la media nacional, taría dientro del grupu de les comunidaes autónomes que se beneficiaríen en mayor midida del desenvolvimientu de la educación cimera. Sicasí, tien de tenese en cuenta que pal analís realizáu usose la información de toles comunidaes que conformen el grupu onde ta asitiada Asturies, polo que nun se llogren resultancies pa una comunidá autónoma concreta, sinón una media pal grupu.

La investigación apurre tamién otra resultancia novedosa dependiendo de los estudios que cursen los estudiantes. Esisten diferencies significatives na relación ente la área de la conocencia nel que se matriculen los alumnos y la crecedera económica de les comunidaes autónomes, lo que paez indicar qu’incentivar la matriculación en ciertes disciplines puede exercer un efectu beneficiosu sobro’l desenvolvimientu económicu de les rexones.

La investigación comparó los datos de la variación del númberu d’universitarios matriculaos y variación del productu interior brutu per cápita. L’espaciu temporal analizáu abarca dende 1985, primer añu del que se disponen cifres completes del númberu de matriculaos, hasta 2016, últimu añu del que se tien información sobro’l productu interior brutu per cápita.

Tamién te podria gustar