ASBRU lleva’l monólogu modernu a Bruseles

Según anunció estos díes l’asociación ASBRU (Asturianos en Bruseles), y d’alcuerdu “col so oxetivu de promocionar la cultura asturiana nes sos distintes manifestaciones y vertientes”, presenta na capital belga una actividá venceyada al mundu de la escena: una representación de monólogos al cargu de Xareos! Xestión Cultural, que trabaya dende va dellos años na creación de lo que se conoz como “Monólogu Modernu”. Los invitaos a esti actu son Lluis Antón González, Inaciu Galán y Benxa Pérez.

ASBRU presenta’l xueves 4 d’avientu na Casa d’Asturies de Bruseles, tresformada pa la ocasión nun café teatru, el trabayu d’estos autores ya intérpretes que, baxo la coordinación d’Inaciu Galán nel llibru “Pa echar unes rises”, de recién publicación, revitalicen el monólogu asturianu y faen que seya atractivu pal públicu de güei.

L’actu, que se cunta col apoyu de l’Axencia Asturiana d’Emigración, va entamar a les siete la tarde cola presentación del llibru “Pa echar unes rises, antoloxía de monólogu modernu”, d’Ediciones Trabe. La presentación va combinase con una breve conferencia sobre’l “Monólogu modernu” a cargu d’Inaciu Galán.

Darréu, va tener llugar l’espectáculu con una esbilla de monólogos colos intérpretes y autores Benxa Pérez, Lluis Antón González ya Inaciu Galán, que pa rematar la xornada van aldericar col públicu asistente sobre’l futuru del monologuismu asturianu.

Con “El Monólogu Modernu” ASBRU pieslla la so intensa axenda d’actividaes de 2008, qu’incluyeron tamién les III Xornaes Gastronómiques ASBRU en xunetu, la esposición Winnersloosers n’ochobre y el III Ciclu de Curtios y Documentales Asturianos en payares, que supunxo l’esitosu estrenu en Bélxica de la película documental “El Astillero”, d’Alejandro Zapico.

Páxina d’ASBRU