Areces considera ‘llamentable’ que’l PP refugue sumase a la reforma l’Estatutu

El presidente del Principáu, Vicente Álvarez Areces, calificó esti xueves 26 na feria FITUR de Madrid, de “llamentable” la negativa del PP a participar na reforma l’estatutu. Respective a l’aplicación p’Asturies del términu nacionalidá, Francisco Sosa Wagner, un de los padres de l’autonomía de la nuestra comunidá, afirma que “ta na Constitución y nun plantea mayores problemes”.

Nun alcuentru colos medios desplazaos a cubrir la presencia d’Areces en FITUR, el cabezaleru del executivu autonómicu, manifestó la so sorpresa énte la posición caltenida pol partíu d’Ovidio Sánchez énte’l procesu de reforma: “cuando va unos meses reclamaba p’Asturies un estatutu de máximos, como’l catalán”. El presidente recalcó el so deséu de que la reforma pueda tar solventada na presente lexislatura.

Per otru llau, el caderalgu de derechu administrativu Francisco Sosa Wagner, ún de los redactores del actual estatutu, declara nuna entrevista concedida al diariu El Comercio qu’Asturies “había reclamar un estatutu igual que’l de Cataluña al día siguiente de que les Cortes apreben l’Estatut” y respective a la denomación de la nuestra comunidá col términu de nacionalidá: “ye una denomación que tá incluida na Constitución y que nun plantea mayores problemes”, ya que “esti tipu de calificación nun tien nengún efectu xurídicu nin competencial”. Sosa Wagner manifiéstase dotramiente contrariu a la oficialidá pal asturianu: “sería una auténtica barbaridá que gravitaría enriba la educación de los neños”, diz l’ex conseyeru del primer gobiernu autonómicu.