Andecha denuncia l’aisllamientu d’Asturies

La reduición de los trenes a Madrid xunto cola inoperatividá del aeropuertu, el chamullu de l’”Autovía del mar”, el peaxe de l’autopista d’El Güerna y la siempres pendiente variante ferroviaria de Payares, aislla a Asturies del restu del mundiu, sigún fai denuncia Andecha Astur nun duru comunicáu al analizar la reduición prevista por RENFE, una vuelta pasáu’l branu, de cuatru trenes direutos a Madrid asina comu’l convoi ensin paraes de los domingos pela tardi.

Esta decisión de RENFE amiéstase pa Andecha “a una situación d’incomunicación xeneralizada del nuesu país, nel que pretende amenorgase’l tamañu d’un aeropuertu infrautilizáu y con una ufierta pocu más que tesmimonial, el “chamullu” de l’”Autovía del mar” que s’esmuz dempués de munches falses promeses de continuidá, el caltenimientu del peaxe de l’autopista d’El Güerna –que Zapatero prometiere anular- y la siempres pendiente variante ferroviaria de Payares, cuya reinal postergación forma parte yá de la hestoria de despropósitos que sufre Asturies, fain que’l nuesu país s’afaye nuna situación d’incomunicación dafechu”.

Sigún Andecha, “les polítiques del Estáu español p’Asturies non solo caten l’esfarrapamientu industrial, económicu, social y cultural d’Asturies, sinon tamién la incomunicación comu un ellementu más de la so estratexa d’esaniciu y asimilación d’un país al que namás se-y facilita daqué la comunicación cuandu llega’l branu, pa que puedan venir los madrilanos a esfrutalu”.

Nel comunicáu nel qu’Andecha fai esta denuncia tamién carga escontra’l silenciu del “Principado” que “ye de nueu una amuesa d’incapacidá y complicidá necesaria pa col Estáu español, y un cargu más del que tendrán que responder énte’l Pueblu Asturianu”.