Andecha Astur ve “un llaváu de cara” na petición d’oficialidá d’Izquierda Xunida en Llaviana

Énte l’anunciu de l’agrupación llocal d’Izquierda Xunida en Llaviana de querer aprobar una nueva declaración d’oficialidá nel conceyu , Andecha Astur considera que la propuesta ye “una llimpieza de cara y una nueva cortina de fumu cola que tentar tapecer la conculcación sistemática de los drechos llingüísticos que fai en tolos conceyos nos que tien responsabilidaes de gobiernu”.

Andecha Astur pide a IX “que dexe d’engañar a los ciudadanos asturianos diciendo que defende la oficialidá del asturianu, cuando los fechos dexen bien nidio que cada vegada que tuvo la oportunidá de sofitar un estatus xurídicu d’oficialidá pa la llingua asturiana que garantizara los drechos llingüísticos de los asturfalantes, tanto nel parllamentu asturianu, como nos propios conceyos, prefirió vender los sos compromisos y promeses elleutorales a cambiu de puestinos y perres”.

La formación nacionaliga encamienta a los grupos políticos presentes na Casa Conceyu de Llaviana “y n’especial a Izquierda Xunida pa qu’aprueben a la fin unes Ordenances Municipales d’oficialidá de la Llingua Asturiana que garanticen y respeten los drechos llingüísticos de los vecinos y que dignifiquen la llingua propia d’Asturies”.

La formación propone nesi sen la so propia vía, y va presentar “nuevamente” nel rexistru de la Casa Conceyu la so propuesta “d’Ordenances Municipales d’oficialidá y pidirá defendeles en plenu”.