CC.OO apoya que les places de profesor de llingua seyan plantiya orgánica

El sindicatu Comisiones Obreres d’Asturies, al traviés de la so Federación d’Enseñanza, dio’l so preste de primeres a “los rumores llanzaos dende la Cosneyería d’Educación sobre la intención d’incluyir les places d’asturianu na plantiya orgánica de los centros”, pero siempre y cuando se cree la especialidá y se convoquen les oposiciones ocrrespondientes pa cubrir los puestos.

Al traviés d’un comunicáu, el sindicatu se refirió al “malestar xeneráu ente los docentes d’Asturianu”, por esti tema, esplicando que “mos alcontramos ante un proyeutu que desconocemos, nun existe nengún documentu escritu que lu esplique, nin hubo negociación nenguna, sólo conversaciones informales o rumores”.

Sicasí, CC.OO entiende que la decisión merecía “una valoración positiva, pero nun debe distrayer l’alderique d’otros aspeutos igual o más importantes”. “A CC.OO”, continúa la nota, ” preocúpa-y qué cambios provocaría la nueva situación na provisión de dichos puestos, ¿quién y cómo los ocuparía nel futuru?”. Pal sindicatu, “el tratamientu debe tratase de manera global, la normalización de la llingua debía pasar, amás de pela dotación de les places, pela creación de la especialidá de Llingua Asturiana y Gallegu Asturianos cuerpos de maestros y profesores d’Enseñanza Secundaria y pela convocatoria d’oposiciones, ufiertándose’l mayor númberu de places posibles, pa que los interinos puean acceder a la fucnión docente nes mesmes condiciones que’l restu d’especialidaes”.

Comisiones criticó “la manera d’actuar de la Conseyería”, y reclamó “claridá de tou esti asuntu, puesto qu’afeuta a les condiciones de trabayu del profesoráu y hai munchos emplegos en xuegu”. CC.OO pide a l’Alministración que ponga’l so proyeutu per escrito mediante un documentu que puea ser oxetu de negociaicón sindical.

A lo último, dende CC.OO s’exixe “la oficialidá, que diba arreglar toes estes cuestiones, y diba dotar a la llingua del estatus xurídicu que se merez, pero ésta nun debe vese como escusa per parte de l’Alministración pa nun crer la especialidá, puesto que l’Alministración tien capacidá pa creala o pidila al MEC ensin la oficialidá, y normalizar la so situación igual que’l restu d’especialidaes”.