Andecha Astur pide una programación “menos vanguardista” nel teatru de La Llaboral

La organización política Andecha Astur ta acabante de pidí-y a Mercedes Álvarez, Conseyera de Cultura y Turismu d’Asturies que’l teatru allugáu na Universidá Llaboral de Xixón y xestionáu al traviés de la empresa pública Recrea, dea “un xiru na xestión y programación”. Y ye que, según declaren dende AA, “nun se pue permitir el despilfarru económicu que Llaboral Escena vien suponiendo dende’l so aniciu”.

Los últimos datos económicos conocíos “ponen los pelos de punta” a Andecha Astur, yá que “dende agostu de 2009 a abril de 2010 la contratación d’espectáculos costó 445.149 €, de los que sólo se recuperaren 55.612 € pola venta d’entraes”.

A ello ha amestase “los miles d’euros que se marafundien na difusión de la programación; una publicidá que, polo que se ve, nun ta siendo nada efectiva. Estos númberos llamen a la reflexón, y más nos tiempos que cuerren, y, amás, ponen de manifiestu la escasa repercusión de los espectáculos contrataos ente’l públicu asturianu”.

La organización política entiende que “los beneficios de la cultura nun se miden en términos económicos, pero camienta qu’esti despilfarru nun se pue permitir, más cuando la programación de Llaboral Escena supón una gran parte del presupuestu de la Conseyería de Cultura y Turismu, cuandu esti añu se recortaren escandalosamente les sovenciones empobinaes a los Conceyos pa la realización d’actividaes culturales y cuandu rescampla l’ausencia de les artes escéniques asturianes na programación del teatru xixonés”.

Por too ello, Andecha Astur apurrió-y a Mercedes Álvarez una riestra conseyos, “útiles pa camudar la situación de Llaboral Escena”, son los que van darréu: “facer un estudiu previu pa conocer qué ye lo que-y presta ver a la xente; cuntar cola opinión del gremiu de profesionales asturianos dedicaos a les artes escéniques a la hora de diseñar la programación; rediseñar la publicidá de los espectáculos y la forma de difundila; apostar pola contratación d’espectáculos más populares y menos vanguardistes, ello ye, más atractivos pa la mayoría de la población; apostar pola producción escénica d’equí, contratando la mayoría de la programación con grupos y artistes asturianos”.