Andecha Astur considera pergrave l’actitú del Congresu español haza la llingua asturiana

La refuga pol Congresu español de la emienda al proyeutu de presupuestos xenerales del Estáu que pretendía un financiamentu pa la l’Academia la Llingua Asturiana costitúi un fechu pergrave que pon n’evidencia la nula sensibilidá de dichu Congresu pa cola nuesa llingua y que supón un precedente negativu que necesariamente habrá de superase nun futuru.

Nel mesmu sen, Andecha Astur remembra qu’el caltenimientu de la situación predemocrática que carez Asturies nel tema llingüístiu, al nun tar reconocía la oficialidá de la llingua asturiana, non solo favorez l’actual contestu de represión llingüística sistemática, sinon qu’acarreta un coste económicu non inferior a los 150.000 € añales.

Asina mesmo, Andecha Astur considera que l’actitú del diputáu de Foro nel Congresu español, Enrique Álvarez Sostres, al presentar tala emienda, costitúi un exerciciu d’inresponsabilidá al nun facer el más mínimu llabor col restu de diputaos pa favorecer la so aprebación, y d’oportunismu políticu, remembrando que demientres Foro presidió el Gobiernu del “Principado”, non solo nun rializó la necesaria declaración d’oficialidá de la llingua asturiana, sinon qu’agora mesmo, ellí onde cunta con poder políticu, comu por exemplu nel Ayuntamientu Xixón, nun lleva alantre denguna política en defensa de la llingua asturiana nin de los drechos llingüísticos de los asturianos.

Pel so llau, Andecha Astur, dempués de conocer el votu a la escontra d’ERC a esta emienda, púnxose en contautu colos sos collacios catalanes pa conocer de primera man los fechos, informándose de qu’el votu de Joan Tardá, “diose por un error procedimental”, asegurando que la so formación “siempres sofita les llingües minoritaries”.