Aerosmith prepara una xira de despidida pa 2017

Lo que yá veníen suxuriendo dellos rumores pasó a ser confirmáu directamente pela boca del líder de Aerosmith, Steven Tyler. “Creo que va ser l’añu próximu”, amestó’l músicu nuna entrevista nel programa The Howard Stern Show.

Va unos meses Tyler yá presumiera de qu’ellos y los Rolling Stones son les úniques dos bandes qu’entá caltienen los sos miembros orixinales, dexando abierta la puerta a una posible separación de Aerosmith. Y agora el músicu quixo terminar d’una vegada por toa coles especulaciones sobre’l so futuru: “Amo esta banda, de verdá, y quiero esclariar tolos pensamientos que cualesquier pueda tener sobre esto: acabóse”.

Ante les entrugues del presentador, Tyler alimentó les esperances de los fans del grupu, al rise de los supuestos tours de despidida de The Kiss o The Who, que finalmente s’enllargaron hasta l’infinitu. De fechu el cantante bromió con que la so última xira va durar “pa siempres” y respondió con un ambiguu “mmmmmh”, cuando-y preguntaron si Joe Perry, guitarrista de Aerosmith, ta al tantu de los planes de separación.