Abellugu: ¿L’Asturies que vien?

Un grupu d’asturianos y asturianes entamen un procesu pa “abellugar xente que quiera lluchar por Asturies”: Abellugu. Una web entama esi procesu que va tener en marzu so momentu clave.
Abellugate: “Tamos entamando un procesu p’abellugar xente que quiera lluchar por Asturies. Nun somos un partíu políticu, nin una coalición d’ellos. Aniciamos Abellugu pa recuperar Asturies pa los asturianos, dende’l Pueblu y pal Pueblu. Si tas interesáu en trabayar por Asturies, rellena’l formulariu y nos pondremos en contrautu contigu. Tenemos una fueya en blancu y queremos enllenada de milenta propuestes contigu”. Con esta proclama, recíbese na Web Abellugu.org a tolos y toles que quieran participar pa algamar una riestra d’obxetivos que puen atopase en tol arcu políticu asturianu:

• Una Asturies igualitaria, comprometida colos derechos sociales
  Una Asturies con una xestión pública de calidá
  Una Asturies que nun dea’l llombu a la so cultura, raigaños, fiestes y tradiciones
  Una Asturies que mire pola so mocedá, sos mayores y sos dependientes
  Una Asturies que comprometida cola so llingua
  Esti llunes presentóse nel uviedín Llar La Llegra esta iniciativa nacida na rede.

El proyeutu tien el so aniciu nel grupu de Facebook ‘Ca Asturies’ y el rostru ye’l de Xurde Lluis González Lains, ún de los sos entamadores. El procesu qu’entamaben esta selmana  va tener el so culme nel mes de marzu, cuando tien de celebrase un conceyu con toles persones interesaes en participar pa llegar a puntos d’alcuentru y afitar oxetivos. Los interesaos en participar puen facelo inscribiéndose al traviés de la so web.