165 mozos rematen el programa d’emplegu “Uviéu Thinks Young”

Un de total de 165 mozos remataron el programa d’emplegu “Uviéu Thinks Young” que, con un financiamientu européu de 1,3 millones d’euros, dexó qu’estos mozos menores de 30 años aportaren a certificaos de profesionalidá y adquirieren competencies profesionales. Mientres les acciones formatives y el periodu de práctiques, los participantes percibieron una beca de 430 euros.

La vicealcaldesa, Ana Taboada, el conceyal d’Economía, Rubén Rosón y el subdireutor Xeneral de Cooperación Local de la Secretaria d’Estáu pa les Alministraciones Locales, Guillermo Fraga, asistieron  esta selmana, al actu de despidida de los participantes del programa d’emplegu “Uviéu Thinks Young”. Un proyectu novedosu premiáu per Europa, que cuntó col financiamientu de 1, 3 millones d’euros estremaos en dos exercicios (201.942 euros para 2017 y 1.046.057 euros para 2018), del que se beneficiaron un total de 165 mozos desemplegaos.

Rosón, resaltó qu’estos mozos salen, gracies a esti programa, con un certificáu de profesionalidá pero tamién con competencies llaborales qu’ameyoren la so empleabilidá, al realizar práctiques profesionales non llaborales nun  total de 80 empreses. Entidaes tamién presentes nel actu de güei, a les que se-yos reconoció’l so compromisu col empléu, y ye que munches d’elles, indicó’l conceyal, “yá amosaron el so interés” n’allargar la relación contractual con estos mozos. Lo que demuestra qu’esti programa d’empléu convirtióse “nun bon procesu de selección de personal”.

Pela so parte, Taboada aprofió qu’esti programa, qu’incluyía amás una beca d’unos 430 euros al mes en conceutu d’asistencia, ye un exemplu más de qu’esti mandatu “foi’l del emplegu y de la puesta en marcha d’una fueya de ruta pa remunicipalizar los servicios”. Al Vivarium y a la Recaldación, consiguíos nestos postreros 4 años va sumase, siguió la vicealcaldesa,  nel próximu mandatu, “la creación d’una empresa municipal de servicios nel que se englobe la llimpieza y el caltenimientu de parques y xardinos” ente otros “colos que vamos aforrar 10 millones d’euros al añu”.