Portada Conceyos “Innerlight”, de Regine Schumann, nueva intervención artística nel Pozu Santa Bárbara

“Innerlight”, de Regine Schumann, nueva intervención artística nel Pozu Santa Bárbara

by redacción asturnews

Esti vienres 10 de marzu, a les 19 hores, el Pozu Santa Bárbara va acoyer la inauguración de la intervención artística “Innerlight”, de Regine Schumann, de forma que la sala de compresores del Pozu Santa Bárbara vuelve convertise n’espaciu pa la intervención artística y failo de la mano d’esta artista alemana d’amplia trayectoria internacional.

Anthony McCall, Herminio y agora… Regine Schumann. La sala de compresores del Pozu Santa Bárbara vuelve convertise n’espaciu para la intervención artística y facer de la mano de Schumann, artista alemana d’amplia trayectoria internacional que llevó por tol mundu les sos obres llenes de colores fluorescentes, de rellumu y contrastes, cola lluz negro como complementu y xugando siempres coles tresparencies y colos reflexos. Con “Innerlight”, la lluz interior cola que Regine Schumann llega a Mieres, l’artista, procedente de familia minera, homenaxa al traviés del so padre a esti oficiu y a esa lluz que ciega cuando salen al esterior dende lo más fondo de la tierra. Una pieza histórica del so catálogu, combinada con otres creaes espresamente para la intervención nel Pozu Santa Bárbara y a les que bautiza col nome de Mieres van dexar esfrutar d’una nueva esperiencia del arte na mina, de el color, la lluz interior y los reflexos verdes, colloraos y azules…

Esti vienres 10 de marzu, a les 19 hores, el Pozu Santa Bárbara va acoyer la inauguración d’esta intervención artística. Una cita, abierta a toes y toos, que va dir más allá d’una inauguración al usu y que va incluyir sorpreses de la mano de distintes disciplines artístiques. “Innerlight”, la tercer intervención artística nel Pozu Santa Bárbara, que se va complementar con una esposición en Mieres Centru Cultural (MCC), ve la lluz y yá ta tou preparáu por que toes y toos esfrutemos d’esta esperiencia. Nesti sentíu, el conceyal de Cultura, Juan Ponte, destacó que “Innerlight” avanza nel afitamientu del Pozu Santa Bárbara, primer pozu mineru declaráu Bien d’Interés Cultural (BIC) n’España, como espaciu d’intervención artística y demuestra “el compromisu del Gobiernu local cola cultura como exa de dinamización del conceyu”.

“Partimos de la nuesa hestoria minera, del arguyu que sentimos pol pasáu compartíu, y buscamos xenerar nueves industries qu’atraigan nuevos públicos y que nos singularicen”, plantegó’l conceyal, qu’incidió na importancia “desacralizar y democratizar l’arte” y d’ufiertar una propuesta “coordinada, pero, coles mesmes, distinta al restu de manifestaciones culturales que se dan n’Asturies”. El Pozu Santa Bárbara ye, ensin dulda, un elementu clave nesti oxetivu, convirtiéndose nun espaciu que, llueñe de ser un continente vacíu que s’enllena d’obres d’arte, conviértese tamién en protagonista en cada intervención. Quepe recordar, nesti sentíu, que’l proyectu del Pozu Santa Bárbara foi incluyíu pol Observatoriu de la Cultura como una de les iniciatives destacaes de too el país en 2021. Agora llega la tercer intervención artística. “Innerlight”, de Regine Schumann.

Tamién te podria gustar