Sociedá L’Academia urxe a Riopedre a equiparar a los mayestros de Llingua colos d’otres especialidaes by asturnet 21 de febreru, 2005 Equiparar a los profesores de Llingua Asturiana colos docentes d’otres especialidaes pa que puean participar n’igualdá en tresllaos y oposiciones. Con esa demanda central, responsables de l’Academia de la Llingua aconceyaron güei col conseyeru d’Educación y Ciencia, José Luis Iglesias Riopedre, col que coincidieron na necesidá d’espardir l’asturianu en centros privaos y concertaos. Al alcuentru asistieron la presidenta de l’Academia, Ana Cano, y l’académicu Xosé Antón González Riaño, quienes urxeron al conseyeru a facer un siguimientu “seriu y rigurosu” de la escolarización en Llingua Asturiana y destacaron la necesidá d’espublizar lo más aína posible los currículos de l’asignatura nos niveles d’Infantil, Primaria y Adultos, asina como la ellaboración de materiales curriculares pa la Secundaria. Asinamesmo, na entrevista que mantuvieron col másimu responsable d’Educación nel Principáu, los responsables de l’Academia reiteraron énte Riopedre la gran importancia que tendría la implicación del Gobiernu autonómicu pa la implantación de los estudios universitarios de Filoloxía Asturiana, una cuestión que nel Plan pa la Normalización Social de Asturianu queda a iniciativa de la Universidá con un posible sofitu formal del Executivu. El conxuntu d’esi documentu -el plan que determina la política llingüística’l Principáu hasta 2007- ta, a los güeyos de Cano y González Riaño, marcáu por “bultables insuficiencies, darréu que los sos conteníos rebaxen mesmamente lespíritu y la lletra de la, yá de por sí percurtia, Llei dUsu del Asturianu de 1998”. Asina-y lo tresmitieron los responsables académicos a Iglesias Riopedre, a quien-y reiteraron la necesidá de la oficialidá de la llingua asturiana pa poder echar a andar una verdadera acción llingüística integral. 21 de febreru, 2005 0 FacebookTwitterPinterestEmail
Sociedá El Gobiernu implica al Estáu na defensa l’asturianu y oblígase a recuperar tolos nomes de llugar en 2007 by asturnet 18 de febreru, 2005 Implicar al Estáu na promoción del asturianu, valorar esti idioma n’oposiciones, garantizar la ufierta de l’asignatura de Llingua “en tolos niveles y graos educativos”, completar la recuperación de la toponimia en 2007 y crear en 2006 un Premiu de les Lletres Asturianes con calter biañal. Son dalgunes de les 68 acciones concretes que plantega’l Plan pa la Normalización Social del Asturianu, cuyu testu íntegru ufre güei Asturnews. A lo llargo de 22 páxines nes que s’elude la referencia espresa a una posible declaración d’oficialidá pa la llingua asturiana, pero qu’abren dafechu el camín a una coficialidá ‘de fechu’, el Gobiernu autonómicu oblígase a sigo mesmu a cumplir la gran mayoría de les midíes en o a partir d’esti mesmu añu, empezando por roblar sendos convenios col Estáu pa qu’emplegue con normalidá la llingua asturiana nos sos organismos asitiaos n’Asturies y pa que reconoza y use los topónimos tradicionales del Principáu. Pa dambos alcuerdos afítase un plazu inmediatu, non más allá de 2005. Toponimia Dos años más tardará en completase la recuperación total de los nomes de llugar n’asturianu, si se cumple lo previsto nel plan. El documentu establez pa 2007 la publicación del nomenclátor y mapa de topónimos oficiales d’Asturies, pasu que dexaría amarrada la validación global de los nomes tradicionales de llugar en llingua asturiana y que se completará cola retulación de cais, carreteres, mapes y planos por parte de la Conseyería de Mediu Ambiente, Ordenación del Territoriu ya Infraestructures. Enseñanza El plan col que’l Gobiernu aplicará la so política llingüística d’equí al final de la llexislatura autonómica mira amás con especial procuru pa la enseñanza y garantiza la ufierta de les asignatures d’Asturianu y Gallego-Asturianu “en tolos niveles y graos educativos”, si bien siguirán aplicándose les ‘ratios’ mínimes d’escolinos nos centros. Tres midíes destaquen nesta estaya: la llucha pola validez de los estudios de Filoloxía Asturiana -anque dexando-y la iniciativa a la Universidá d’Uviéu-, la edición d’un programa p’alfabetización d’adultos n’asturianu y la ellaboración, en 2006, d’un estudiu xurídicu sobro la posible especialidá’l profesoráu de Llingua en niveles non universitarios. Usu institucional N’otros ámbitos, el plan de normalización plantega incrementar l’usu del asturianu na publicidá institucional, la imaxe gráfica y la web oficial de l’Alministración autonómica; promueve la formación llingüística de los funcionarios n’andecha col Institutu Asturianu d’Alministración Pública ‘Adolfo Posada; alita la difusión del asturianu en tiendes, eventos deportivos y denominaciones d’orixe; y establez la publicación billingüe de “dalgunos testos normativos relevantes”. Producción cultural El plan de normalización nun s’escaez de la estaya de la cultura. El testu cuyos conteníos aprobó ayeri’l Conseyu de Gobiernu afita la creación, a partir de 2006, d’un Premiu de les Lletres Asturianes con calter biañal, promueve la presencia de la lliteratura n’asturianu en feries fuera’l Principáu, abre-y la puerta a la convocatoria d’ayudes directes a la creación y obliga a actualizar cada añu el catálogu bibliográficu n’asturianu. Toles midíes propuestes nel documentu tienen validez pal gallego-asturianu nel occidente d’Asturies. Archivu. El Gobiernu da-y el preste a los conteníos del primer plan integral de normalización del asturianu 18 de febreru, 2005 0 FacebookTwitterPinterestEmail
Sociedá La Xunta de Toponimia almite ‘Llangréu’ por razones sociolóxiques y dexa que decida l’Ayuntamientu by asturnet 18 de febreru, 2005 ‘Llangréu’ con ‘u’ ye un nome “plenamente válidu y aceptable por razones de tipu sociolóxicu y políticu, con un manifiestu usu social ya institucional que-y da carta de naturaleza innegable”. La Xunta Asesora de Toponimia matiza nesos términos la so controvertida propuesta d’afitar el nome ‘Llangreo’ y avanza qu’asumirá, según un comunicáu asoleyáu esta mañana, la decisión final del Ayuntamientu mineru. Nun comunicáu oficial empobináu a primer hora de güei al Ayuntamientu llangreanu y robláu pol director xeneral de Promoción Cultural y presidente de la Xunta, Carlos Madera, l’organismu asesor quier acabar cola intensa polémica suscitada dende que’l pasáu 10 de xineru avalara la forma ‘Llangreo’ pa designar al conceyu de la cuenca’l Nalón, pesie a que’l propiu municipiu emplega dende hai años con normalidá el nome ‘Llangréu’ na so imaxen corporativa. Nel documentu unviáu esta mañana, la Xunta reitera que ‘Llangreo’ con ‘o’ “ye la única forma autóctona que se constata na tradición oral de los asturfalantes del conceyu” y recuerda qu’esi topónimu apaez como válidu nel nomenclátor de l’Academia de la Llingua, pero reconoz darréu la validez del nome ‘Llangréu’, “usáu parcialmente na lliteratura popular y xeneralizada na llingua escrita actual”. La Xunta Asesora de Toponimia defende’l so llabor porque’l so deber, puntualiza, ye “ufrir la información filolóxica de manera fidedigna”, pero reconoz la “plena llexitimidá” del Ayuntamientu pa optar ente la ‘o’ y la ‘u’ finales nuna decisión qu’en cualquier casu acatará la Xunta. L’informe orixinal que pue descargase dende equí pa la so llectura, suscitó reacciones alcontraes dende’l momentu mesmu nel que s’asoleyó. L’espediente de ‘Llangreo’ supera’l primer trámite col apoyu de PP y PSOE y l’abstención d’IX-Bloque 18 de febreru, 2005 0 FacebookTwitterPinterestEmail
Sociedá El Gobiernu da-y el preste a los conteníos del primer plan integral de normalización del asturianu by asturnet 17 de febreru, 2005 Lluz verde a los conteníos del Plan de Normalización Sociollingüística. El Conseyu de Gobiernu dio-y esti mediudía el so preste a les 68 midíes concretes qu’integren el documentu que rexirá la política llingüística d’equí al final de la llexislatura autonómica, en 2007, si bien l’aprobación formal del documentu produciráse la prósima selmana. El testu plantega nueves ayudes directes a los escritores, mayor proyección del asturianu fuera’l Principáu y l’usu d’esa llingua na tv autonómica. En total, el testu final del plan estructúrase en seis grandes bloques en tornu a los cuales xirará l’acción llingüística del Gobiernu autonómicu nos dos prósimos años: l’ámbitu institucional -con especial procuru nes iniciatives de los ayuntamientos, la enseñanza, la toponimia, los medios de comunicación, la producción cultural y la propia sensibilización social p’alitar a los ciudadanos a emplegar con normalidá la llingua asturiana. Según avanzó’l director de la Oficina de Política Llingüística y responsable de la redacción del documentu, Ramón D’Andrés, el testu “garantiza” la presencia del asturianu na radiotelevisión autonómica en términos inda por determinar, pon especial atención na difusión llingüística nos Centros Asturianos allugaos fuera’l Principáu y plantega l’usu habitual y normalizáu del idioma asturianu na imaxen corporativa y na publicidá institucional del Gobiernu autonómicu. Mecanismu d’execución Trazáu dende marzu pasáu y sometíu a una revisión final que se prollongó varies selmanes, el plan de normalización incorpora un presupuestu propiu, afita plazos precisos pa llevar alantre les midíes -toponimia y polítiques municipales figuren ente les más inminentes- y tendrá un mecanismu específicu pa garantizar la so execución que ta ultimándose nel sen del propiu Gobiernu. Conforme informara Asturnews a primer hora d’ayeri, la conseyera de Cultura, Comunicación Social y Turismu, Ana Rosa Migoya, comprometiera l’aprobación del Plan de Normalización Sociollingüística pa güei. Esa aprobación prodúxose ‘de fechu’, anque’l trámite final llegará nel Conseyu de Gobiernu de la prósima selmana. Archivu. Avance, en xunu de 2004, de los conteníos del plan 17 de febreru, 2005 0 FacebookTwitterPinterestEmail
Sociedá Migoya asegura que’l plan integral de política llingüística aprobaráse esta mesma selmana by asturnet 16 de febreru, 2005 Sedrá mañana, xueves, si nun hai inesperaes complicaciones d’última hora. La conseyera de Cultura, Comunicación Social y Turismu, la socialista Ana Rosa Migoya, aseguró ayeri que’l Plan de Normalización Sociollingüística aprobaráse a la fin na reunión ordinaria’l Gobiernu prevista pa mañana, y avanzó que’l 40 por cientu de les midíes trazaes nel documentu de política llingüística competen a otres conseyeríes ayenes a Cultura. Migoya pronunció eses pallabres nuna xuntanza que mantuvo n’Uviéu con representantes del Observatoriu de Política Llingüística, qu’acudieron a la sé de Cultura pa urxir el cumplimientu de los alcuerdos sobro normalización del asturianu firmaos nel pactu de Gobiernu ente PSOE ya Izquierda Xunida-Bloque por Asturies y pa espresar una doble impaciencia: polo que tovía nun se fizo y tamién pol curtiu plazu qu’hai pa lo que queda por facer, yá que l’Executivu acércase al ecuador de la llexislatura autonómica. Según los responsables del Observatoriu qu’acudieron a la cita -na que tamién participaron el director xeneral de Política Llingüística, Carlos Madera, y el xefe de la Oficina de Política Llingüística, Ramón D’Andrés- la másima responsable de Cultura dio por fecho que’l plan de normalización aprobaráse mañana, depués de seis selmanes d’espera, anque una cabera torga amenaza con interponese nel llargu partu’l documentu: La fuerte gripe cola que Migoya se retiró ayeri darréu de la reunión. Na axenda oficial del Gobiernu, la titular de Cultura nun tien comprometida la so presencia en nengún actu pa güei. Más d’un terciu, fuera de Cultura Poco se sabe entá del testu final que s’ellabora dende la pasada primavera y que mañana algamará previsiblemente rangu de llei pa estructurar la política llingüística d’equí a 2007. Miembros del Observatoriu felicitáronse, ensin embargu, de qu’a lo menos el 40 por cientu de les midíes concretes plantegaes nel plan de normalización dependan d’otres conseyeríes ayenes a Cultura porque, entienden, eso garantiza una normalización social más amplia del asturianu n’estayes esenciales como, por exemplu, la educación. Ana Rosa Migoya refirióse asinamesmo a la validación de los primeros topónimos tradicionales en llingua asturiana, pasu pal que yá tán dispuestos cuatro conceyos, y argumentó que la recuperación de la toponimia implica tamién a otres conseyeríes, polo qu’evitó poner plazos precisos. Archivu. El 70 por cientu de los alcuerdos llingüísticos del pactu de Gobiernu permanez na ‘nevera’ 19 meses depués 16 de febreru, 2005 0 FacebookTwitterPinterestEmail
Sociedá El sector de la cultura estrenó l’añu con una baxada nos precios del 1,8 por cientu by asturnet 16 de febreru, 2005 L’añu empezó más baratu nel sector de la cultura. Los precios de los productos y servicios culturales baxaron en xineru un 1,8 por cientu con respecto al mes anterior, una cifra que cooperó nun descensu xeneral de les tarifes lideráu poles rebaxes en vistíu y calzáu y que dexa, con calter global, los precios n’Asturies un 1,3 por cientu perbaxo d’avientu de 2004. Según los datos qu’esta mañana asoleyó l’Institutu Nacional d’Estadística (INE), correspondientes a la evolución de los precios nel primer mes de 2005, la cultura sigue exerciendo n’Asturies como frenu del aumentu’l coste de la vida, con un descensu del 1,8 por cientu sólo superáu pol más espectacular del 13,4 por cientu rexistráu na ropa por mor de les rebaxes. Esi 1,8 por cientu ye amás, por agora, la tasa d’inflación acumulada, yá qu’esti indicador mide la evolución de los precios a lo llargo de cada añu natural, mientres que l’índiz d’inflación interañal, que mide la perda progresiva de valor del dineru nos últimos doce meses, marca que la cultura ye agora un 1,4 por cientu más barata nel Principáu qu’hai un añu. Esa tasa ye más ventaxosa pa los consumidores asturianos que pa los del conxuntu del Estáu, que vieron cómo los precios del ociu y la cultura aumentaron una décima dende xineru de 2004 pesie a rexistrar un descensu del 1,2 por cientu en xineru con relación al mes anterior. Con calter global, los precios xubieron un 3,1 por cientu n’España nel últimu añu. Datos íntegros na web del INE 16 de febreru, 2005 0 FacebookTwitterPinterestEmail
Sociedá El Conceyu pola Oficialidá entama una asamblea estraordinaria pa ultimar la manifestación de marzu by asturnet 16 de febreru, 2005 La primer gran manifestación pol asturianu de 2005 ultima los sos preparativos. Les más d’ochenta entidaes polítiques, sindicales, cíviques y culturales qu’integren el Conceyu Abiertu pola Oficialidá tán llamaes a una asamblea estraordinaria el prósimu martes n’Uviéu p’amarrar los últimos detáis y difundir los cartelos y pegatines de la marcha convocada pal 5 de marzu. La manifestación, de la que yá se puen ver cartelos nes cais d’estremaes ciudaes d’Asturies, tendrá como reclamación fundamental el puntu básicu qu’axunta a los distintos collectivos que formen parte’l Conceyu: La inclusión de la coficialidá de la llingua asturiana na inminente reforma del Estatutu d’Autonomía, una ocasión na que llingüistes y militantes ven l’últimu tren pa la sobrevivencia efectiva del asturianu. Pa preparar y difundir la movilización, los miembros del Conceyu Abiertu pola Oficialidá participarán nuna xuntanza que tendrá llugar a partir de les 19 hores del martes nel auditoriu ‘Príncipe Felipe’ d’Uviéu, casi dos selmanes antes de la manifestación que, a les 12,30 hores del sábadu 5 de marzu, trescurrirá pol centru de la capital asturiana. Nes últimes selmanes, el Conceyu buscó un mayor grau de sofitu a les sos reivindicaciones promoviendo una ampliación de la llista de firmantes qu’avalen el so manifiestu fundacional, nel que se reclama la “inescusable” inclusión de la coficialidá de la llingua asturiana na prósima actualización del testu l’Estatutu. Archivu. Izquierda Xunida-Bloque defenderá en soledá la coficialidá na negociación política del nuevu Estatutu 16 de febreru, 2005 0 FacebookTwitterPinterestEmail
Sociedá El 70 por cientu de los alcuerdos llingüísticos del pactu de Gobiernu permanez na ‘nevera’ 19 meses depués by asturnet 11 de febreru, 2005 Lo esencial permanez nel ‘conxelador’ alministrativu. Siete de les diez principales midíes de política llingüística afitaes nel pactu de Gobiernu ente PSOE ya Izquierda Xunida-Bloque por Asturies inda nun s’acometieron o siguen ensin resultaos patentes 19 meses depués de la firma l’alcuerdu, ente elles el desendolcu de la Llei d’Usu, l’aprobación y aplicación del plan de normalización y el puxu de la llingua asturiana nos medios de comunicación. Sólo tres puntos del decálogu de midíes principales se llevaron por agora a la práctica: La propia creación de la Dirección Xeneral y la Oficina de Política Llingüística, l’impulsu de la toponimia tradicional y, nuna llectura xenerosa, la definición de los criterios de normalización del gallego-asturianu nel Navia-Eo, esto cabero al traviés de la edición de guíes con orientaciones pa la normalización d’esa variante nos municipios y del llanzamientu d’una campaña qu’alitaba a la matriculación en gallego-asturiano nos colexos ya institutos del occidente. Pero en términos globales y na llende l’ecuador de la llexislatura autonómica, el vasu ta enforma más vaciu qu’enllenu: El plan de normalización sigue siendo sometíu a caberos “axustes” a la espera de la so aprobación nel Conseyu de Gobiernu, el desendolcu por reglamentu de la Llei d’Usu y Promoción del Asturianu nin siquiera se plantegó formalmente, el panorama de la presencia del asturianu nos medios de comunicación nun rexistró avances notables debíos a l’acción del Principáu y la “presencia efectiva” del asturianu en toles estayes educatives, asina definida nel pactu, ye más que discutible a los güeyos de los integrantes de la comunidá educativa. Nueva política editorial Na llista de xeres pendientes del pactu de Gobiernu, robláu a primeros de xunetu de 2003, inclúinse amás la puesta en marcha d’una nueva política pública pa la edición que -sacante la innovadora promoción de llibros de testu n’asturianu- finalmente nun tien visos d’aplicase como tal, al marxe d’un comprometíu adelantu na fecha de la convocatoria, y la formación xeneralizada de funcionarios pa garantiza-yos a los ciudadanos l’usu del asturianu, sólo abordada d’un mou mui discretu dende dalgún Ayuntamientu. No que cinca al “sofitu y reconocencia” especiales plantegaos nel pactu de Gobiernu pa l’Academia de la Llingua, al marxe de consideraciones formales esa entidá mantién postures distantes cola propia Oficina de la Llingua y sigue reivindicando, mesmo qu’hai cuatro años, unes instalaciones qu’acaben coles “absolutes” limitaciones d’espaciu que diz tener la institución. 11 de febreru, 2005 0 FacebookTwitterPinterestEmail
Sociedá Izquierda Xunida-Bloque defenderá en soledá la coficialidá na negociación política del nuevu Estatutu by asturnet 9 de febreru, 2005 Ún de tres na Xunta Xeneral. Sólo Izquierda Xunida-Bloque por Asturies defenderá la inclusión de la coficialidá de la llingua asturiana na inminente reforma del Estatutu d’Autonomía, según confirmó ayeri’l cordinador d’IX nel Principáu, Jesús Iglesias, no que cinca a la so formación política. Los otros dos partíos con representación parlamentaria, PP y PSOE, que sumen 41 de los 45 diputaos autonómicos, empezarán a negociar cola oficialidá fuera de les sos propuestes. Yera notorio, pero Jesús Iglesias ratificólo ayeri: Izquierda Xunida insistirá en pidir la inclusión de la reconocencia l’asturianu como llingua coficial nel nuevu testu del Estatutu d’Autonomía porque, entiende’l responsable de la coalición, l’idioma d’Asturies afronta esa negociación como l’últimu tren pa evitar la so desapaición. El compañeru d’IX nel Parlamentu autonómicu, el Bloque por Asturies, secundará esa demanda. No que cinca a la parte llingüística de les conversaciones polítiques pa renovar l’Estatutu, el repartu de fuercies sedrá desigual: A los cuatro diputaos que marquen el pesu políticu d’IX-Bloque na Xunta Xeneral del Principáu enfrentaránse-yos los 45 diputaos autonómicos de PSOE y PP, partíos que sentarán na mesa de negociación cola oposición a la coficialidá como primer argumentu. Nel casu de los socialistes, que lleven el pesu del Gobiernu autonónicu y qu’ostenten el mayor pesu políticu a la hora de tomar decisiones finales, la vocera l’Executivu y conseyera de Cultura, Ana Rosa Migoya, dexó claro a finales d’avientu, nuna entrevista radiofónica, que “los socialistes nunca fuimos partidarios de la coficialidá y mantendremos esa postura porque asina lo dicten les nueses resoluciones congresuales”. Archivu. Migoya avanza que los socialistes opondránse a incluyir la coficialidá na reforma del Estatutu 9 de febreru, 2005 0 FacebookTwitterPinterestEmail
Sociedá La Fundación ‘Príncipe’ pon en marcha l’almisión de candidatures pal premiu al Pueblu exemplar by asturnet 9 de febreru, 2005 Hasta’l 19 d’agostu. Esi ye’l plazu nel que permanecerá abierta l’almisión de candidatures pal premiu al Pueblu exemplar d’Asturies, que ta acabante convocar na edición de 2005 la Fundación ‘Príncipe de Asturias’ y ta dotáu con 25.000 euros. El galardón quier distinguir a pueblos, aldegues o grupos humanos que destaquen la defensa’l so entornu y patrimoniu o na fechura d’obres n’andecha. Acordies col reglamentu’l premiu, que la Fundación ‘Príncipe’ reparte yá por corréu a personalidaes, collectivos y medios de comunicación del Principáu, les candidatures podrán ser unviaes por corréu ellectrónicu o certificáu, o bien presentaes físicamente na sé social de la Fundación, allugada na cai Xeneral Yagüe d’Uviéu. El premiu entregaráse nel prósimu mes d’ochobre, nel marcu de la entrega de los premios ‘Príncipe de Asturias’, qu’esti añu cumplen el so 25 aniversariu, y otorgaráse a un núcleu de población o humanu destacáu nel so llabor collectivu por caltener los raigones del so propiu territoriu. Amás de la llocalidá de Vil.lar de Vildas, en Somiéu, que resultó premiada na edición de 2004, na nómina de ganadores del premiu al Pueblu exemplar d’Asturies figuren, ente otros, los Pastores de los Picos d’Europa, la comunidá vecinal y educativa d’Ibias y les poblaciones de Tuña (Tinéu), Paredes (Valdés), Nava y Castropol. Web de la Fundación ‘Príncipe de Asturias’ 9 de febreru, 2005 0 FacebookTwitterPinterestEmail