El 70 por cientu de los alcuerdos llingüísticos del pactu de Gobiernu permanez na ‘nevera’ 19 meses depués

Lo esencial permanez nel ‘conxelador’ alministrativu. Siete de les diez principales midíes de política llingüística afitaes nel pactu de Gobiernu ente PSOE ya Izquierda Xunida-Bloque por Asturies inda nun s’acometieron o siguen ensin resultaos patentes 19 meses depués de la firma l’alcuerdu, ente elles el desendolcu de la Llei d’Usu, l’aprobación y aplicación del plan de normalización y el puxu de la llingua asturiana nos medios de comunicación.

Sólo tres puntos del decálogu de midíes principales se llevaron por agora a la práctica: La propia creación de la Dirección Xeneral y la Oficina de Política Llingüística, l’impulsu de la toponimia tradicional y, nuna llectura xenerosa, la definición de los criterios de normalización del gallego-asturianu nel Navia-Eo, esto cabero al traviés de la edición de guíes con orientaciones pa la normalización d’esa variante nos municipios y del llanzamientu d’una campaña qu’alitaba a la matriculación en gallego-asturiano nos colexos ya institutos del occidente.

Pero en términos globales y na llende l’ecuador de la llexislatura autonómica, el vasu ta enforma más vaciu qu’enllenu: El plan de normalización sigue siendo sometíu a caberos “axustes” a la espera de la so aprobación nel Conseyu de Gobiernu, el desendolcu por reglamentu de la Llei d’Usu y Promoción del Asturianu nin siquiera se plantegó formalmente, el panorama de la presencia del asturianu nos medios de comunicación nun rexistró avances notables debíos a l’acción del Principáu y la “presencia efectiva” del asturianu en toles estayes educatives, asina definida nel pactu, ye más que discutible a los güeyos de los integrantes de la comunidá educativa.

Nueva política editorial

Na llista de xeres pendientes del pactu de Gobiernu, robláu a primeros de xunetu de 2003, inclúinse amás la puesta en marcha d’una nueva política pública pa la edición que -sacante la innovadora promoción de llibros de testu n’asturianu- finalmente nun tien visos d’aplicase como tal, al marxe d’un comprometíu adelantu na fecha de la convocatoria, y la formación xeneralizada de funcionarios pa garantiza-yos a los ciudadanos l’usu del asturianu, sólo abordada d’un mou mui discretu dende dalgún Ayuntamientu.

No que cinca al “sofitu y reconocencia” especiales plantegaos nel pactu de Gobiernu pa l’Academia de la Llingua, al marxe de consideraciones formales esa entidá mantién postures distantes cola propia Oficina de la Llingua y sigue reivindicando, mesmo qu’hai cuatro años, unes instalaciones qu’acaben coles “absolutes” limitaciones d’espaciu que diz tener la institución.