El Gobiernu da-y el preste a los conteníos del primer plan integral de normalización del asturianu

Lluz verde a los conteníos del Plan de Normalización Sociollingüística. El Conseyu de Gobiernu dio-y esti mediudía el so preste a les 68 midíes concretes qu’integren el documentu que rexirá la política llingüística d’equí al final de la llexislatura autonómica, en 2007, si bien l’aprobación formal del documentu produciráse la prósima selmana. El testu plantega nueves ayudes directes a los escritores, mayor proyección del asturianu fuera’l Principáu y l’usu d’esa llingua na tv autonómica.

En total, el testu final del plan estructúrase en seis grandes bloques en tornu a los cuales xirará l’acción llingüística del Gobiernu autonómicu nos dos prósimos años: l’ámbitu institucional -con especial procuru nes iniciatives de los ayuntamientos, la enseñanza, la toponimia, los medios de comunicación, la producción cultural y la propia sensibilización social p’alitar a los ciudadanos a emplegar con normalidá la llingua asturiana.

Según avanzó’l director de la Oficina de Política Llingüística y responsable de la redacción del documentu, Ramón D’Andrés, el testu “garantiza” la presencia del asturianu na radiotelevisión autonómica en términos inda por determinar, pon especial atención na difusión llingüística nos Centros Asturianos allugaos fuera’l Principáu y plantega l’usu habitual y normalizáu del idioma asturianu na imaxen corporativa y na publicidá institucional del Gobiernu autonómicu.

Mecanismu d’execución

Trazáu dende marzu pasáu y sometíu a una revisión final que se prollongó varies selmanes, el plan de normalización incorpora un presupuestu propiu, afita plazos precisos pa llevar alantre les midíes -toponimia y polítiques municipales figuren ente les más inminentes- y tendrá un mecanismu específicu pa garantizar la so execución que ta ultimándose nel sen del propiu Gobiernu.

Conforme informara Asturnews a primer hora d’ayeri, la conseyera de Cultura, Comunicación Social y Turismu, Ana Rosa Migoya, comprometiera l’aprobación del Plan de Normalización Sociollingüística pa güei. Esa aprobación prodúxose ‘de fechu’, anque’l trámite final llegará nel Conseyu de Gobiernu de la prósima selmana.

Archivu. Avance, en xunu de 2004, de los conteníos del plan