L’Academia urxe a Riopedre a equiparar a los mayestros de Llingua colos d’otres especialidaes

Equiparar a los profesores de Llingua Asturiana colos docentes d’otres especialidaes pa que puean participar n’igualdá en tresllaos y oposiciones. Con esa demanda central, responsables de l’Academia de la Llingua aconceyaron güei col conseyeru d’Educación y Ciencia, José Luis Iglesias Riopedre, col que coincidieron na necesidá d’espardir l’asturianu en centros privaos y concertaos.

Al alcuentru asistieron la presidenta de l’Academia, Ana Cano, y l’académicu Xosé Antón González Riaño, quienes urxeron al conseyeru a facer un siguimientu “seriu y rigurosu” de la escolarización en Llingua Asturiana y destacaron la necesidá d’espublizar lo más aína posible los currículos de l’asignatura nos niveles d’Infantil, Primaria y Adultos, asina como la ellaboración de materiales curriculares pa la Secundaria.

Asinamesmo, na entrevista que mantuvieron col másimu responsable d’Educación nel Principáu, los responsables de l’Academia reiteraron énte Riopedre la gran importancia que tendría la implicación del Gobiernu autonómicu pa la implantación de los estudios universitarios de Filoloxía Asturiana, una cuestión que nel Plan pa la Normalización Social de Asturianu queda a iniciativa de la Universidá con un posible sofitu formal del Executivu.

El conxuntu d’esi documentu -el plan que determina la política llingüística’l Principáu hasta 2007- ta, a los güeyos de Cano y González Riaño, marcáu por “bultables insuficiencies, darréu que los sos conteníos rebaxen mesmamente l’espíritu y la lletra de la, yá de por sí percurtia, Llei d’Usu del Asturianu de 1998”. Asina-y lo tresmitieron los responsables académicos a Iglesias Riopedre, a quien-y reiteraron la necesidá de la oficialidá de la llingua asturiana pa poder echar a andar una verdadera acción llingüística integral.