Los partíos políticos asturianos comprometense a impulsar una Llei de Fundaciones pal Principáu

Representantes del Partíu Socialista, el Partíu Popular, Foro, Izquierda Xunida, Equo, UPyD y Podemos amosáronse partidarios d’impulsar una Llei de Fundaciones del Principáu d’Asturies qu’apurra un marcu regulatorio estable al sector fundacional asturianu nun alcuentru entamáu esti xueves n’Uviéu pola Asociación Española de Fundaciones (AEF).

Javier Nadal, presidente de l’Asociación Española de Fundaciones (AEF), sorrayó la necesidá d’un marcu regulador afayadizu pa les fundaciones asturianes que “promueva la participación de la sociedá civil y contribuya a amontar el financiamientu priváu de les entidaes ensin fin d’arriquecimientu”, como respuesta a la importante contribución a la sociedá asturiana d’un sector (el fundacional) que representa un Valor Añedíu Brutu de 85 millones d’euros, beneficia a más de 600.000 persones y emplega a 4.200 asturianos” .

Nel alcuentru celebráu esti xueves nel Hotel Barceló Cervantes d’Uviéu participaron Olga Álvarez, en representación d’Equo; Ignacio Iglesias, por Foro; Marta Pulgar, d’Izquierda Xunida; Lucía Montejo, de Podemos; Susana López, del Partíu Popular; Fernando Lastra, del Partíu Socialista; y Adán Fernández, UPyD, que coincidieron na necesidá d’aprobar una Llei autonómica de Fundaciones que regule’l funcionamientu del sector fundacional asturianu.

La AEF lleva trabayando na puesta en marcha de la Llei de Fundaciones del Principáu d’Asturies dende del añu 2007 y nel añu 2009 ellaboró, cola collaboración d’un equipu de xuristes especializaos en lexislación fundacional, una propuesta de Llei de Fundaciones del Principáu d’Asturies, qu’entá nun foi oxetu de tramitación nel Parlamentu d’Asturies, y la creación d’un Protectoráu Únicu nel Principáu d’Asturies (anguaño ta estremáu ente distintes conseyeríes), que disponga de les atribuciones necesaries y los medios humanos y materiales abondos pa cumplir con eficacia la función que tien encamentada.