Les llibreríes esconxúrense para faer frente a los xigantes

Les llibreríes esconxúrense para faer frente a los xigantes
10 marzu 10:00 2020 Imprimir

Los llibreros españoles decidieron pasar a l’acción y van poner en marcha primero que remate l’añu una plataforma de vientes que pretende faer frente a los xigantes de la distribución.

El XXIV Congresu de Llibreríes, que se celebraba en Málaga, axuntó a más de 300 profesionales del llibru coles mires de proponer acciones competitives que contribuyan a faer frente a los principales desafíos del sector.

El congresu, que nesta ocasión celebrabase sol significativu lema de Re Evolución Llibrera, presentaó la importante meyora del proyectu todostuslibros.com, un portal que yá recibe dos millones de visites mensuales, el doble de les de 2018, que se va tresformar na plataforma de vientes del sector. Un portal que dispon yá de 1.200.000 títulos, procedentes de la gran base de datos que conformen 750 llibreríes de toa España.

Los llibreros creen que llegó’l momentu de dexase de llamentos y ponese a buscar soluciones y acciones eficaces en redol a la competencia que representen les grandes plataformes para’l negociu tradicional de les pequenes llibreríes de tola vida.

Por ello, una de les meses del congresu malagueñu llevaba’l significativu títulu de “Nun ye Amazon, somos nós”, na qu’editores, distribuidores y llibreros encetaron los cambeos a los qu’emponen les nueves dinámiques del mercáu y analicen les debilidaes y fortaleces del sector.

El congresu, que ta entamáu pola Confederación Española de Gremios y Asociaciones de Llibreros (CEGAL), non yá pretende faer frente a los desafíos comerciales, sinón que va buscar iniciatives para fomentar la llectura y crear nuevos llectores. Nesti terrén van presentase tamién les meyores que s’introducieron na páxina web laslibreriasrecomiendan.com, un espaciu d’encamientu llibreru que tien l’oxetivu d’aumentar la visibilidá de les llibreríes independientes y consolidar redes de contactu con el llectores.

Amás, programáronse otres dos meses que respuenden a grandes temes qu’esmolecen a la sociedá, como ye’l papel de la muyer nel mundu del llibru y la posibilidá d’incorporar más criterios d’igualdá nel mundu del llibru y otra sobro criterios de sostenibilidá qu’ayuden a un amenorgamientu del impactu de la industria del llibru sobro’l mediu ambiente.

El congresu clausurolu l’escritor vascu Bernardo Atxaga, Premiu Nacional de les Lletres Españoles 2019.

  Categories: