L’Academia llamenta que namás la FSA refugare asumir l’alcuerdu social sobre la llingua

04 xunetu 23:18 2005 Imprimir

L’Academia de la Llingua Asturiana dio a conocer esta mañana los resultaos de les atopaes que caltuviera la institución con partíos políticos, axentes sociales y asociaciones culturales pa tresmiti-yos la so propuesta d’un Alcuerdu Social sobre la Llingua y la Cultura asturianes. De tolos interlocutores namás la FSA amosó la so negativa a asumir tolos cinco puntos de la propuesta, el primeru de los cualos yera la oficialidà. Ana Cano afirmó qu’énte la negativa de los socialistes el pautu ye imposible y considera cumplíu el llabor negociador de l’Academia nesi sen, ensin descartar retomalu “si les condiciones polìtiques y el bien d’Asturies asina lo aconseyen”.

Talo prometiera la institución académica al empiezu de los sos contactos colos estremaos axentes políticos y sociales, tres completase la ronda de converses llegaba la hora de tresmitir a la opinión pública’l resultáu de los alcuentros. El primer puntu que l’Academia quiso resaltar per voz de la so presidenta, Ana Cano, foi la favoratible y mayoritariamente bona acoyida de la so propuesta per parte de tolos axentes consultaos, cola escepción del PSOE. Esta unanimidá, n’opinión de l’Academia, val p’afitar que nestos momentos daríense les condiciones básiques p’algamar un alcuerdu como’l propuestu pola institución, pero la postura contraria de los socialistes asturianos a asumir el primer puntu de los cinco llantaos na propuesta: la oficialidá, imposibilita’l pautu.

Cano, preguntada poles razones esgrimíes pola FSA pa refugar una vez más la posibilidá de reconocer oficialmente al asturianu como llingua, la presidenta afirmó que los sos interlocutores per parte del partíu socialista, José Luis Montes y Javier Fernández tresmitiéron-y a l’Academia que la oficialidá yera un asuntu que nun podíen asumir en base a los alcuerdos congresuales del PSOE asturianu, onde se descartaba esta opción y qu’esti yera un asuntu sobre’l que namás podía decidir un congresu de la FSA. Ana Cano, sicasí, destacó la cordialidá cola que se desenvolvió tanto ésti como los restantes alcuentros y nun descartó que los socialistes asturianos retomen nun futuru la posibilidá d’asitiase a favor de la oficialidá. La so posición actual, en cualquier casu, fai imposible l’alcuerdu, ya qu’en palabres de la

presidenta de l’Academia: “los cinco puntos nun tan ordenaos arbitrariamente y la oficialidá ye’l primeru, ensin ella nun se puede falar de normalización nin de nengún otru asuntu, poro, dende’l momentu que se refuga esti puntu ya nun hai alcuerdu posible”.

Ana Cano dixo que cumplíu’l llabor mediador de l’Academia agora yeren otros, los axentes sociales y el movimientu cívicu los qu’habíen coyer la iniciativa pal reconocimientu llegal del asturianu como llingua oficial. “L’Academia nun renuncia a siguir desixendo la oficialidá, como siempre fizo”, afirmó Cano. Nel comunicáu entregáu a los medios na rueda de prensa -na que la presidenta l’Academia tuvo acompañada por Miguel Ramos Corrada y Xosé Antón González Riaño- la institución agradez l’acoyida a la so propuesta en toles estayes sociales onde se presentó y afirma qu’esi “sofitu y comprensión” faen sentise a la institución “moral y socialmente autorizada y sofitada pa retomar bien llueu la iniciativa asoleyada’l 6 de mayu si les condiciones polítiques y el bien d’Asturies asina lo aconseyen”.

A preguntes d’una reportera de si nos sos contactos incluyera a la Conseyería de Cultura y si les relaciones tenses que caltién l’Academia col departamentu qu’empobina Ana Rosa Migoya, la presidenta de l’Academia dixo que “les relaciones bones o males con Cultura nun tienen de ver nesti asuntu, van per otru camín, en cualquier casu les nuestres propuestes pal Alcuerdu Social nun cinquen namás a esa Conseyería, tamién dependeríen d’Educación, por exemplu”. Cano informó de que sí teníen pidida una entrevista col presidente del Principáu, inda hasta agora nun tuvieran respuesta positiva nesi sen: “lo que nun quier dicir que nun se vaya producir esa entrevista agora o más alantre”, puntualizó la presidenta de la institución académica.

Los cinco puntos del Alcuerdu Social pa la Llingua y la Cultura Asturianes de l’Academia yeren: la cooficialidá del asturianu nel Estatutu; l’afitamientu de conteníos de normalización y plazos na so puesta en práctica; un pautu presupuestariu, conseñando’l mínimu necesariu pa facer vidable y efectivu l’usu social de la llingua; la dignificación, recuperación y divulgación de la cultura asturiana; l’inxerimientu de l’Antropoloxía Cultural Asturian, nel nivel que correspuenda, dientro de la Universidá d’Uviéu.

  Categories:
Loading Facebook Comments ...