La izquierda Asturiana contra la Llei Gallardón del albuertu

Andecha Astur, como ficieren darréu toles fuerces d’izquierdes n’Asturies esta fin de selmana, llamaba a la rempuesta social y desixía al “Principado” que nun aplique la nueva llei Gallardón y garantice l’albuertu llibre y gratuitu na sanidá pública. Dende la refuga dafechu al anteproyeutu de llei del albuertu presentada pol gobiernun español nel Conseyu de Ministros, Andecha Astur pide a la sociedá asturiana una rempuesta contundente, y al “Principado” la non aplicación d’esta llei, darréu que nun se trata de l’aplicación d’una llinia política determinada, sinon de la negación de los drechos de la muyer, y almitila y aplicala supondría ser cómplices d’un atentáu escontra los drechos humanos.

Nesi mesmu sen, pide-y al “Principado” que garantice l’albuertu llibre y gratuitu na sanidá pública.

Pel so lláu, l’área de la muyer de IU Asturies fizo públicu tamién so refugu a la reforma de la llei del albuertu, al considerar que supon un retrocesu ensin precedentes en derechos y llibertaes de les muyeres. La secretaria de Comunicación de la formación, Mayka Barrios, manifestó so convencimiento de que’l cambéu lexislativu nun se basa en criterios oxetivos de necesidá sinón ideolóxicos: “Castiga la llibre elección de les muyeres pa decidir en qué momentu queremos ser madres”.

Con esti cambéu, afirmó Barrios, España xuntase al club de países europeos más retrógrados na materia. “Ye una contrarreforma que nos asitia a nivel de países como Polonia. Ente que tábamos empezando a ser un país piqueru n’igualdá, vimos que na última publicación del Foru Económicu de la Igualdá baxemos alredor de 14 puntos”. La esplicación d’esi descensu ye consecuencia directa, añedió Mayka Barrios, de toles midíes de retayos puestes en marcha pol PP, y nes que les muyeres tán siendo unu de los colectivos más castigaos. Ello ye que la reforma definese como’l colofón d’un procesu de involución que yá empezó en 2007 con un amenorgamientu, dende esi añu, del 50% en polítiques d’igualdá.

Mayka Barrios rellacionó’l cambéu de la llei del albuertu cola otra cara de les reformes conservadores del PP: “Atopamos con un Gobiernu que si les polítiques económiques dexar a la Troyka, les de bienestar social ya igualdá a la conferencia episcopal, colo que podríamos dicir que más que ministros paecen enllaces”.

Barrios refugó les declaraciones de Gallardón al respective de que cola llei trata de defender a les muyeres: “Les muyeres de lo único que tamos siendo víctimes, por desgracia, ye de les polítiques que ta tomando’l Gobiernu, que van dende la reforma llaboral, que nos ataca especialmente en temes de baxes maternales; eliminación d’ayudes a la dependencia, cuando les muyeres somos les principales cuidadores, con un percorríu misóxinu que termina agora cola eliminación del derechu de la llibre elección a la d’enfrentanos con una decisión tan importante como ser madres. Como dixo Crystal Eastman, hai muncha tiranía amarutada de protección”.

Ente los sindicatos tamién se ficieron sentir glayíos ala escontra d’esta llei. La Estaya de Muyeres del sindicatu d’enseñanza SUATEA denunciaba esti día “qu’esta reforma supondrá un empioramientu de les condiciones sanitaries, ya que consideren qu’esti remocique nun va facer qu’amenorgue’l númberu d’albuertos. Al contrariu, estos sedrán clandestinos. Denuncien amás la falta de talante democráticu del gobiernu español, amosáu na escuridá cola que lleven esti remocique. Afiten pa finar que l’albuertu ye un drechu y decisión de les muyeres, que debe reconocese como tal.”

Daqué asemeyao facía Muyeres en Llucha de la CSI solidarizándose coles deteníes en Madrid na manifestación contra la reforma l’albuertu.