Entama’l programa APTENISA START coles 12 idees de startups escoyíes

Tresformar idees en negocios de base tecnolóxica ye l’oxetivu del programa APTENISA START qu’arrinca esti miércoles coles primeres sesiones por que mozos entamadores, cuntando con asesores y especialistes, puedan convertir el so talentu en posibles empreses.

APTENISA START ye una iniciativa amparada pola Rede Nacional de Parques Tecnolóxicos (APTE) y l’Empresa Nacional d’Innovación (ENISA), que va actuar de catalizador d’idees innovadores y de talentu, con oxetu de contribuyir a la creación sistematizada de proyectos que puedan consolidase en startups rentables.

Yá fueron escoyíes 12 idees de base tecnolóxica, respondíes por por 34 persones (13 muyeres), y a partir d’equí va trabayase a lo llargo d’ocho sesiones para convertiles en proyectos vidables y escalables, con mayor axilidá, capacidá d’adaptación y permeabilidá nel texíu granible. El Parque Científicu Tecnolóxicu d’Avilés ye l’encargáu de la planificación ya implantación de les acciones formatives, lo mesmo que de la coordinación, dinamización y siguimientu de les ocho sesiones que se celebren hasta’l 26 de mayu.

Los proyectos escoyíos son de lo más variao. Dende una web que tresforma mapes en sistemes 3D, un sistema para la prevención del bullying, el tresformamientu de biocombustibles n’hidróxenu verde, plataformes para’l rexistru de documentos, a la creación d’espacios virtuales por que persones ciegues puedan esfrutar y conocer les aves al traviés de tours por paisaxes sonoros.

Les sesiones van llevar a cabu n’Espaciu Maqua los díes 3, 10, 17 y 26 de mayu. Na última sesión va tener llugar un DEMO DAY, un eventu onde el entamadores faen una presentación final de los proyectos coles sos meyores y visiones, destacando’l potencial de les propuestes énte los sos posibles veceros ya inversores. Cada participante va presentar de forma clara y concisa el proyectu que maurecieron mientres les sesiones.

Mientres 8 sesiones de 2 hores, va implementase un métodu desenvueltu nes universidaes de California y Standford, pioneres del emprendimiento científicu – tecnolóxicu, p’ayudar pasu a pasu nel desenvolvimientu de negociu: dende la idea inicial hasta la constitución de la empresa, la validación del modelu de negociu y el desenvolvimientu del veceru al traviés d’entrevistes col mercáu. Mientres estes sesiones, van aprender técniques de financiamientu y van reforzase habilidaes de comunicación contribuyendo a romper les barreres con potenciales inversores.

L’oxetivu del proyectu ye ayudar a entamadores dende la idea inicial hasta la fase d’aceleración, cola validación del modelu de negociu y la so constitución. Les organizaciones tractoras: La Sal-y Technova Barcelona xuntu cola Fundación Parque Científicu de Madrid, ponen a disposición un equipu de xestores, entamadores, inversores, científicos, asesores y directivos con esperiencia van sofitar el desenvolvimientu de los productos, servicios y van validar los modelos de negociu, al traviés del este primer programa.

Más información