El binomiu Ciencia y Sociedá centra’l foru Horizonte Asturies 2

Espaciu Maqua va acoyer esti sábadu 11 de febreru, a partir de les 10:30 hores, el foru Horizonte Asturies 2. Coincidiendo col Día Internacional de la Muyer y la Neña na Ciencia, Conecta Industria entama una nueva xornada esti foru, nesta ocasión centráu nel binomiu Ciencia y Sociedá.

La cita pretende fomentar les vocaciones científiques según establecer una radiografía del estáu actual del ecosistema científicu ya innovador del Principáu d’Asturies. Y el foru va cuntar cola participación de profesionales del ámbitu investigador, tantu empresarial como universitariu.

Coles mesmes, delles autoridaes van intervenir na so apertura: l’alcaldesa d’Avilés, Mariví Monteserín; el conseyeru de Ciencia, Innovación y Universidá, Borja Sánchez; el vicerrector d’Investigación de la Universidá d’Uviéu, Antonio Fueyo; y el director de Desenvolvimientu de Negociu de Conecta Industria, Carlos Vega. Esti postreru va cerrar tamién la xornada, acompañáu pol conceyal de Desenvolvimientu Urbanu y Económicu, Manuel Riola.

El foru ‘Horizonte Asturies 2 / Ciencia y Sociedá’ va arrincar a les 10:00 hores con un almuerzu y networking ente los asistentes. Tres l’actu institucional d’apertura, previstu pa les 10:30 hores, va dar empiezu la presentación del informe ‘Muyer, innovación y ciencia n’Asturies: xuna aproximamientu cuantitativu’ de la mano d’Elena Lasarte Navamuel, Lorena García Alonso, Ana Salomé García Muñiz y Tania Fernández García, pertenecientes al equipu de la Cátedra pal analís de la Innovación n’Asturies, C_ANUEVA.

A les 11:15 hores va dar empiezu la charra ‘Tu escueyes’, al cargu de Teresa Valdés-Solís Iglesias, científica nel Institutu Nacional del Carbón (INCAR-CSIC) y presidenta de l’Asociación de Divulgación Científica d’Asturies. Al traviés de la mesma va buscar inspirar y amosar casos d’ésitu pa impulsar y fomentar les vocaciones STEM.

L’apartáu más empresarial va centrar la mesa ‘El papel de la ciencia pa una meyor sociedá’, que va cuntar cola participación de Tatiana Mansu (ArcelorMittal), Marta Palacios (Idonial), Itziar Ahedo (Universidá d’Uviéu) y Rosario Fernández (CINN/CSIC). Va Moderar la charra Iván Aitor Lucas, director Xeneral d’Innovación, Investigación y Tresformamientu Dixital del Gobiernu d’Asturies.

Les inscripciones p’allegar al Horizonte Asturies 2 son gratuites y atópense disponibles nesti enllaz.

El proyectu cunta col sofitu destacáu del Conceyu d’Avilés, la Fundación Asturiana de la Enerxía (FAEN), Merkle, l’Axencia Local de Promoción Económica y Empléu de Xixón y la Conseyería d’Industria, Empléu y Promoción Económica del Principáu d’Asturies

Más información