Los videoxuegos caltienen sesgos de xéneru

Les muyeres representen la metá de xugadores de videoxuegos en tol mundu, pero los sesgos de xéneru clatiénense vivos nesta industria, que ye la más grande del entretenimientu, superando yá a la música y el cine. Ye’l resultáu d’una investigación espublizada esti día na revista de la Royal Society Open Science.

L’estudiu amuesa que los personaxes femeninos son menos nes pantalles, tienen imaxes más sexualizaes y exercen roles de menor importancia, de manera que les sos representaciones refuercen los estereotipos yá conocíos. Esti nuevu estudiu súmase agora a esta evidencia, afitando que los personaxes femeninos nun solo apaecen menos, sinón que falen menos y tienen diálogos de menor relevancia.

La investigación, publicada na revista de la Royal Society Open Science, analizó seis millones de palabres pronunciaes por más de 13.000 personaxes de 50 videoxuegos de rol, onde les conversaciones son cruciales para la trama. Según el autores del estudiu, ye la primer vegada que se mide la representación de xéneru nes conversaciones ficticies a llarga escala y les resultancies demuestren que los diálogos de los personaxes femeninos suponen la metá de los masculinos. En parte, esto débese a la falta de personaxes femeninos, pero tamién hai sesgos al respective de qué dicen y con quién falen. De media, atribúyese-yos diálogos de menor importancia y hai un enclín nidiu a que interactúen menos con otros personaxes del mesmu xéneru.