Denise Despeyroux y Pablo Remón van escoyer la meyor narración de #HistoriasAvilesinasEnCasa

Denise Despeyroux y Pablo Remón van escoyer la meyor narración de #HistoriasAvilesinasEnCasa. Les propuestes pueden unviase hasta’l 21 d’abril a la dirección programacionaviles.es y a partir del llunes 27 d’abril, dambos dramaturgos van compartir nes redes sociales les hestories escoyíes. La persona que resulte ganadora va recibir dos entraes para asistir a cualquier eventu que’l Teatru Palacio Valdés acueya mientres 2020.

Los prestixosos dramaturgos Denise Despeyroux y Pablo Remón van integrar el xuráu que va escoyer les meyores narraciones participantes nel concursu #HistoriasAvilesinasEnCasa, enmarcáu dientro de les actividaes que’l Teatru Palacio Valdés programó para’l periodu de confinamientu.

El certame abrió’l pasáu sábadu 11 el plazu d’unviada de propuestes al traviés del corréu electrónicu programacionaviles.es. El martes 21 d’abril va ser l’últimu día nel que podrán unviase creaciones basaes nes vivencies personales mientres el confinamientu.

Les HistoriasAvilesinasEnCasa tendrán d’unviase en dos formatos: escritu, con una estensión máxima d’una páxina; y sonoru, que va consistir n’una grabación d’hasta 2 minutos de duración na que la persona autora del relatu va narrar de viva voz la so creación. La unviada tendrá d’acompañase de nome completu y teléfonu de contactu.

Una vegada recibíes toles propuestes, Denise Despeyroux y Pablo Remón van empecipiar un trabayu de selección para dempués, a partir del llunes 27 d’abril, compartir les meyores hestories al traviés de los perfiles del Teatru Palacio Valdés en Facebook (TeatroPalacioValdes) y Instagram (teatropvaldes).

Finalmente, d’ente toles candidatures escoyíes va escoyese xuna ganadora, que va recibir como premio dos entraes p’asistir a cualquier eventu que se realice mientres 2020 nel Teatru Palacio Valdés.

#HistoriasAvilesinasEnCasa propón al públicu d’Avilés que participe escribiendo la so propia hestoria sobro cómo ta viviendo estos díes de confinamientu, siguiendo un principiu tan esencial pal teatru como’l de compartir hestories.