Concentración n’apoyu de los militantes de la Xunta denunciaos por pidir la oficialidá

Seis miembros de la Xunta pola Defensa de la Llingua Asturiana tán llamaos a xuiciu de faltes pa esti 25 de setiembre, por participar nuna acción reivindicativa, en defensa de la oficialidá del asturianu, el pasáu día16 de xunu, coincidiendo cola inauguración del Centru de Salú de Llugones, onde s’alcontraba’l presidente del Gobiernu asturianu, Vicente Álvarez Areces. La “pita” y dellos miembros de la organización de defensa de los derechos llingüísticos taben reclamando la oficialidá nel momentu nel que fueron reteníos poles fuerces de seguridá, pa facer la identificación de los militantes.

Énte la denuncia a los seis miembros de la organización de defensa de los derechos llingüísticos de los asturianos, representantes de la Xunta manifestaron que “si al presidente Areces-y molesta que les crítiques tresciendan a la opinión pública, la via pa evitales nun ta na criminalización sinon na corrección de la política de marxinación llingüística que ta llevando alantre’l so gobiernu”, por eso, la Xunta, qu’aclarió que na manifestación de los sos militantes nun hebo disturbios nin engarradielles, sinón que simplemente se fizo actu de presencia con pancartes d’apoyu a la llingua, “quier denunciar qu’estes actuaciones son contraries al exerciciu del derechu a la llibertá d’espresión y a la crítica política. Ye evidente qu’esto, qu’en distintos graos llevamos careciendo dende va muncho tiempu, namás persigue callar les voces crítiques cola xestión d’esti gobiernu”.

Por esa razón, la Xunta pola Defensa de la Llingua afirma que pela vía xudicial nun van abandonar la denuncia pública de la situación de “marxinación y falta de derechos que carez la llingua asturiana y les persones falantes d’asturianu”.

Per parte de la Xunta pola Defensa de la Llingua Asturiana, los militantes encausaos “van cuntar cola solidaridá y l’apoyu de la organización”, que tien convocada una concentración a la una la tarde del día 25 de setiembre ente los xulgaos de la Cai Parroco Fernandez Pereda de Siero.