YouTube Originals abandona les sos series y documentales orixinales

El portal de videos online YouTube va dexar de producir conteníu orixinal so la marca YouTube Originals, una estratexa qu’implementó va seis años pa competir con plataformes como Netflix y HBO.

Dende’l so debú en 2016, la marca estrenó series como ‘Cobra Kai’ y ‘Step Up’, amás de documentales y formatos de telerrealidá protagonizaos por estrelles de Hollywood como Will Smith y cantantes de la talla de Justin Bieber, Camilo, Alicia Keys y Demi Lovato. Sicasí, la estratexa de YouTube Originals nun llogró desapegar y llegó a perder a delles de les sos producciones en favor d’otres plataformes de la competencia, como ‘Cobra Kai’, que pasó a manos de Netflix.

El director comercial de YouTube, Robert Kyncl, anunció esti martes el cambéu de planes del portal, que ye propiedá de Google y d’equí p’arriba va basar el so modelu de negociu n’agospiar conteníu producíu por ceadores independientes. “Nel futuru, solo vamos financiar programes que formen parte de los nuesos programes Black Voices y YouTube Kids”, añedió Kyncl. Coles mesmes, la directora de la división de formatos orixinales, Susanne Daniels, va abandonar la compañía.

Ente les producciones de YouTube Originals con más repercusión destacaron ‘Justin Bieber: Seasons’, ‘Demi Lovato: Dancing With The Devil’, ‘Will Smith: Best Shape of My Life’ y ‘The Real Story of Paris Hilton’. La marca tamién retresmitió conciertos en directu d’artistes como Taylor Swift, Coldplay, Paul McCartney y Andrea Bocelli.

YouTube nació en 2005 como una plataforma p’agospiar videos publicaos por usuarios y en 2006 foi adquirida por Google, tres lo que se convirtió nel so segundu portal más visitáu y una de les plataformes más populares d’internet en tol mundu.