Yá ta na rede la primer parte del Nomenclátor de Toponimia Oficial

El Nomenclátor presentáu esti xueves ye un catálogu ordenáu y xerarquizáu de los nomes oficiales de les entidaes de población, según consten nos Decretos de Oficialización aprobaos pol Conseyu de Gobiernu y publicaos nel Boletín Oficial del Principáu d’Asturies. Nél puede consultase la información actualizada de trabayos d’oficialización.

Cada nome acompáñase, si ye’l casu, de la forma oficial anterior y de les variantes toponímiques que se constaten. Coles mesmes indícase la posición xeográfica de cada topónimu espresada por aciu dos coordenaes nun determináu sistema de referencia, dexando d’esta miente la so localización ya integración con cualesquier otra información georreferenciada (cartografía, ortofotografía, redes de carreteres…). El propósitu del N.G.T.O.P.A. ye facilitar a tolos usuarios (alministraciones, medios de comunicación, empreses, asociaciones…) un accesu rápidu y efectivu a la toponimia oficial del Principáu d’Asturies. Pa ello apúrrese la consulta en dellos formatos de salida: pdf, Excel, Access y Google Earth.

Nesta presentación espublizáronse namás los datos relativos al Conceyu de Xixón, que pasu ente pasu se dirán amontando colos topónimos y coordenaes xeográfiques de tolos conceyos que cunten col correspondiente Decretu d’Oficialización.

La ellaboración del N.G.T.O.P.A. corrió al cargu de un equipu integráu por técnicos de la Dirección Xeneral de Política Llingüística y del Centru de Cartografía dependiente de la Dirección Xeneral d’Ordenación del Territoriu y Urbanismu, siguiendo’l modelu de datos definíu pol Modelu Nomenclátor d’España na so versión 1.2 (MNEv1.2)

Archivos pa la descarga del Nomenclátor