Xuristes pol Asturianu fizo repás a les alegaciones del Principáu nel casu de la cuestión d’inconstuticionalidá sobre la Llei d’Usu

Redacción.

L’Aconceyamientu de Xuristes pol Asturianu protestó ayeri pola “ actitú del gobiernu asturianu na causa xudicial pol drechu del lletráu Xurde Blanco Puente a poder rellacionase n’asturianu cola alministración asturiana”, na que’l titular del Xulgáu de lo Contencioso-Alministrativo númberu 3 d’Uvieu anunció la posibilidá d’interponer una cuestión d’inconstitucionalidá escontra los artículos 2, 4 y 7 de la Llei d’usu del asturianu de 1998.

Los miembros de l’asociación esplicaron que’l demandante Xurde Blanco Puente “presentó con tiempu, argumentos abondos en defensa de la Llei”, mientres que pela so parte, el Ministeriu Fiscal nun presentó alegaciones polo que Xuristes pol Asturianu “entiende que la fiscalía nun tien interes n’ocupase de los drechos llingüísticos de los asturianos”.

Pal colectivu de xuristes “l’executivu asturianu fai del fenómenu llingüísticu causa de confrontación política coles sos alegaciones”. Y ye que los servicios xudiciales del Principáu entamó’l so escritu defendiendo “la plena vixencia del artículu 4 del Estatutu d’Autonomía, reconociendo l’usu de la llingua nos ámbitos culturales, artísticos y sociales… campañes institucionales de publicidá y comunicación, de publicaciones, del BOPA, de llogotipos diversos…”. Pero diciendo al mesmu tiempu qu’hai una “imposibilidá de que los empleaos públicos usen o se comuniquen nel exerciciu de les funciones que-yos son propies en llingua distinta al castellanu”.

Con estes alegaciones, pa Xuristes pol Asturianu queda claro que pal PSOE “l’emplegu del asturianu tien de circunscribise a la bohemia cultural y artística” y “a la ciudadanía con particularidaes culturales”.