Xuristes pol Asturianu denuncia que los topónimos aprobaos n’Asturies son inaplicables

Col asoleyamientu, va yá pa tres años, del Decretu 30/2005, pel que se determinaben los topónimos oficiales del conceyu de Carreño, entamando asina un procesu que nestos años llevo a la oficialización de los nomes tradicionales de más d’una cuarta parte de los conceyos asturianos. Sicasí, y según denuncia l’Aconceyamientu de Xuristes pol Asturianu, esti cambiu “nun tien más qu’un valir simbólicu y nun permite camudar el nome del to llugar nel DNI o nos cartelos oficiales dependientes del Estáu”.

Valir simbólicu porque, per agora, “el práuticu ye bien poco por nun dicir nada”. La negativa al camudar el nome nos documentos oficiales vien porque “los nuevos topónimos nun tán na llista oficial”. Lo mesmo va pasar nel intre de rotular indicadores de carreteres, facer mapes, roblar contratos, empadronase, asoleyar disposiciones…

XPA recordó que esa “llista oficial” nun ye oro que’l “Nomenclátor d’unidaes poblacionales del Institutu Nacional d’Estadística”, nel que tolos núcleos de población tienen de tar identificaos pel nome y once díxitos. Y ehí, al Nomenclátor del INE, comenten los xuristes, “nun aportaron entá los conteníos de los Decretos d’igua de la toponimia asturiana”.

La pregunta de los Xuristes pol Asturianu ye “¿Por qué en tres años nun s’aperió esti asuntu que fai de los Decretos papel moyao?”. Y recuerda que “los conceyos tienen el deber de revisar el padrón y dientro d’elli la rellación d’entidaes y núcleos de población, polo poco una vegada al añu, y unviala darréu al Insitutu Nacional d’Estadística ( artículos 17.2 de la Llei 7/1985, de Bases de Réxime Llocal, y 76 del Real Decretu 1690/1986, Reglamentu de Población de les Entiudaes Llocales); y, dempués, que’l mesmu INE ta na obligación (citáu artículu 17.2 de la Llei 7/1985 y 78 del Real Decretu 1690/1986) de requerir a los conceyos pa que cumplan colo que la norma establez y, en casu contriu, suplílos nello”.

Pa camudar esta situación, l’Aconceyamientu de Xuristes pol Asturianu vien de dirixise per escritu a tolos alcaldes involucraos y al Institutu Nacional d’Estadística (presidenta y delegáu n’Asturies) encamientándo-yos a toos “la igua urxente del estropiciu”.

Nomenclátor d’unidaes poblacionales del Institutu Nacional d’Estadística