Xunta Moza convoca una fuelga xeneral na Enseñanza pola situación del asturianu

Xunta Moza, la organización xuvenil de la Xunta pola Defensa de la Llingua, espera que la fuelga xeneral na enseñanza que tien convocada pa esti miércoles 23 tenga un siguimientu masivu per parte de los estudiantes en tolos niveles. La situación na que ta la llingua asturiana nel sistema educativu ye’l motivu de la segunda gran movilización polos derechos llingüísticos nes aules.

Los convocantes afirmen que la Conseyería d’Educación d’Asturies incumple sistemáticamente la llexislación vixente n’Asturies sobre la presencia de la llingua asturiana na enseñanza. La situación actual ye considerada por Xunta Moza “especialmente grave” na educación secundaria y bachilleratu con problemes como qu’a xuiciu de la organización cívica: l’asignatura d’asturianu apaez como optativa, non como voluntaria como diz la llei, enfrentando’l conocimientu d’asturianu col d’otres asignatures como’l francés, etc.; la imposición d’un cupu mínimu de 8 estudiantes por cursu pa ufrir l’asignatura d’asturianu, lo que pa la Xunta “vulnera’l derechu individual a cursar l’asignatura, faciéndolu depender de la elección del restu los compañeros y compañeres y na práctica, na mayoría de los institutos nun se respeta’l cupu”, ya qu’en bien de centros “hai grupos de hasta 15 estudiantes que pidieron cursar l’asignatura de llingua asturiana y nun se-yos pon profesor” y arriendes d’ello “oblígase a estos compañeros y compañeres a matriculase n’otres optatives”. La Xutna denuncia tamién que nesti cursu escolar, hai abondos centros onde nin siquiera apaez la opción de l’asignatura d’asturianu nos impresos de matrícula, esta situación señálase “especialmente grave y xeneralizada” nos cursos de bachilleratu.

Otres razones que xustifiquen la convocatoria de fuelga ye que “munchos de los pocos centros onde esiste la posibilidá de cursar l’asignatura nun se ta respeando l’horariu reglamentariu de dos hores selmanales que queda reducíu a una hora” y em dellos centros, según la Xunta: “danse casos d’alumnos que depués d’empezar el cursu cola asignatura d’asturianu son desviaos forzósamente a otres optatives por decisión de la dirección”.

La fuelga xeneral espera tener un ésitu importante en tola xornada del prósimu 23 de payares y hai convocada pal meudía d’esti miércoles una concentración n´Uviéu na Plaza Hespaña énte les dependencies de la Conseyería d´Educación.