Xulio Llaneza presentó en Samartín el “Vocabulariu de Santa Bárbola”

El pasáu sábadu 10 de setiembre, nel marcu de la FEMEX que se celebraba nel Parque El Florán, en Samartín del Rei Aurelio, Xulio Llaneza presentó’l so llibru “Vocabulariu de Santa Bárbola”.

Fízolo nel stand de Radio Samartín con presencia de públicu y la presentación pudo sintise a traviés de la radio en direuto, dientro del programa “Al llau del llar”.

Durante la presentación Llaneza esplicó como surdió facer el llibru,editáu por B.Alto, el so procesu d’ellaboración y tol trabayu previu pa recoyer la información acerca del mou de falar de la xente de la parroquia de Santa Bárbola, con una amplia escoyeta qu’abarca pallabres de toles estayes de la vida diaria, incluyendo más de 7500 entraes, que tal y como dixo, tovía nun agoten la gran bayura de la fala local, polo que nun descarta la so ampliación nuna próxima edición. Tamién fizo referencia a dalgunos de los rasgos llingüísticos más singulares d’esta zona, como por exemplu, la metafonía vocálico. Durante la presentación l’autor aprovechó pa facer delles consideraciones con respeutu al usu de la llingua asturiana na sociedá y al so futuru.

Xulio Llaneza ye de Perabeles, maestru y llicenciáu en Filosofía y Lletres y Doctor en Filoloxía Hispánica. Ye miembru de l’Academia de la LlinguaAsturiana y destaca pol so llabor na recoyida de tola toponimia oral de les cinco parroquies del conceyu de Samartín del Rei Aurelio asina como la de la parroquia cabraliega de Berodia y les de Carrio y Tolivia de Llaviana. Esta toponimia apaez recoyida en varios cuadernos editaos pola Academia de la Llingua y suponen una información mui importante, que nel so momentu se tomó como base pa la oficialización toponímica de los llugares d’estos conceyos.