Xixón, Uviéu y Candás acueyen les celebraciones del nacionalismu asturianu

Dalgo distinto pue sentise esti añu na celebración del Día de la Nación. Los esfuercios fechos poles formaciones asturianistes pa xuntase nun solu actu nun fueron quien a espeyase del too, pero a la fin l’actu impulsáu pol Bloque por Asturies en Xixón va ser el que cunte con más participantes. Sicasí, amás, la plataforma Democracy for Asturies y les formaciones URAS y PAS van celebrar dos actos, n’Uviéu y Candás, respectivamente.

En Xixón: Pol futuru d’Asturies

Concentración a les 12.30 hores nos Xardinos del Nauticu. Participen del actu, l’actor asturianu Toño Caamaño, representantes de dellos colectivos asturianos, Javier Orozco, refuxáu políticu colombianu y l’actor José Antonio Lobato. Amás, van actuar el gaiteru Llorián García Florez, y la cantadora de tonada Mari Luz Cristóbal, ente otros.

La ciudá más grande d’Asturies va recibir l’actu convocáu por delles organziaciones embaxo l’impulsu del Bloque por Asturies, qu’abandonó’l Gobiernu y el pautu con Izquierda Xunida va pocos meses. La Plataforma Unitaria 8 de Setiembre, nome que garró esti pautu, ta sofitada pol sindicatu SUATEA, el colectivu Entemecer, la formación de Muros del Nalón S. XXI, la Corriente Sindical d’Izquierda, Bloque por Asturies, UNA, Fai!, Andecha Astur, UICA, Asturianistes por Nava y Más Corvera.

Nesti actu ta confirmada la presencia del tovía miembru d’Izquierda Xunida, Javier García Valledor, que nos meses últimos abandonó’l so cargu de diputáu por esta formación.

N’Uviéu: Democracy for Asturies

Manifestación a la una la tarde, con salida de la Estación del Norte.

Nel actu que va celebrase na capital d’Asturies, impulsáu pola plataforma Demcrocia p’Asturies embaxo’l mesmu lema, van tar, según la organización, “y ente otros”, Andecha Astur, la organización xuvenil Darréu y el sindicatu asturianu Corriente Sindical d’Izquierda (CSI).

En Carreño: URAS-PAS