Portada Música Xixón prepara un branu enllenu de música

Xixón prepara un branu enllenu de música

by asturnet

El Conceyu de Xixón anunció yá delles de les actuaciones coles que va cuntar esti branu, dedicaes a la música y el musical. El musical Chicago, Miguel Ríos y el musical pa neños “Cantajuegos”, van llegar a estremaos espacios del conceyu a lo llargo de xunetu.

Chicago, del 7 al 17 de xunetu nel Teatru Xovellanos

Asesinatu, avaricia, corrupción, esplotación, adulteriu, y traición: toes eses coses qu’amamos y llevamos con ciñu cerca del corazón… Asina entama Chicago unu de los musicales más espectaculares del nuesu tiempu de los mesmos productores de Cabaré.

Marta Ribera, María Blanco y Manuel Rodríguez acompañaos d’un brillosu cuerpu de baille constitúin la pieza clave del musical Chicago qu’arrincó la xira’l 12 d’agostu pasáu y va percorrer demientres un añu ininterrumpíu más de 35 ciudaes de tol estáu.

Miguel Ríos despídese de los asturianos nel Palaciu los Deportes de Xixón

El sábadu 9 xunetu, a les diez de la nueche, Miguel Ríos diz adiós cola so xira “Bye bye tour”, nel Palaciu los Deportes de Xixón.

Miguel Ríos ñació en Granada en 1944. Editó’l so primera EP en 1962 pa la compañía Phillips Records y, dende entós hasta los nuesos díes, produció dalgunes de los meyores cantares del repertoriu del rock en castellán n’infinidá de discos, y contribuyó al desenvolvimientu d’esta música nel estáu español y en Llatinoamérica, actuando con munchos de los sos meyores esponentes.

CantaJuego, la música de moda ente los más pequeños

El domingu 10 de xunetu de magar les siete la tarde, el Palaciu los Deportes acueye’l músical basáu nos vidios del “CantaJuego”.

Una vegada más, de la mano de CantaJuego, lléganos un entreteníu y risonderu espectáculu del que podrá esfrutase, como siempres, en familia y con amigs. CantaJuego – ¡Qué lo Baille Tol Mundu 2011!, introduznos na aventura de preparar una fiesta sorpresa a unu de los nuesos personaxes más queríos. 70 minutos de diversión por que toos y caún dende’l so llugar participen y se sumen a la maxa y el ciñu qu’esprenden los amigos y personaxes de CantaJuego.

Les entraes pa tolos espectáculos yá tán a la venta nos llugares habituales nos que distribuye’l Teatru Xovellanos.

Tamién te podria gustar