Asturnews ufre la primer aplicación de llectura de noticies n’asturianu pal Android de Google ya iOS d’Apple

Asturnews lleva dende’l so nacimientu hái cásique 15 años adelantándose a la implementación en la prensa dixital asturiana de les principales novedaes teunolóxiques. Entamó a emplegar Twitter cuando ningún periódicu asturianu, dixital o non, lo facía n’Asturies y lo mesmo asocedió cola apaición de la so canal de You Tube y delles otres novedaes que se van axuntando una tres d’otra.

Agora, Asturnews llanza la primer aplicación en llingua asturiana que se desenrrolla y que se pue descargar nun teléfonu móvil con sistema operativu Android, que ye amás la primer aplicación en llingua asturiana que se fai pa móviles de última xeneración, tamién conocíos como smartphones. L’aplicación que ya pue descargase dende l’Android Market tará bien pronto disponible tamién pal iPhone d’Apple y la so tableta iPad. La presencia nel Apple Market suel retrasase un pocu más por mor de les condiciones de seguridá qu’impón la compañia de la mazana y qu’allarguen el procesu de certificación dellos meses, inclusu.

Mentantu se ta esperando a esa certificación, los usuarios del iPhone o del iPad puen emplegar el so navegador safari, siendo detectada la conexón pol servidor qu’ufrirá una versión de la web d’Asturnews dafechamente preparada pal dispositivu.