Xeira y la Xunta pola Defensa de la Llingua refuguen participar nes Xornaes de Ribadeo

La Xunta pola Defensa de la Llingua Asturiana y l’asociación cultural Xeira nun van tar nes xornaes que la prósima selmana se celebren en Ribadeo organizaes pola Universidá de Vigo pa debatir de la normalización llingüística en Galicia y n’Asturies. Les discrepancies y el refugue a les últimes iniciatives provenientes de la comunidá vecina pa la tierra de Navia-Eo paecen tar nel orixe d’estes ausencies nun alcuentru que fue duramente criticáu va unos díes pola Academia de la Llingua.

Nel programa de les xornaes, nomaes I Escola Permanente Fermín Penzol, taba anunciada la presencia pal sábadu 29 d’ochobre del filólogu y miembru de la Xunta pol Defensa de la Llingua, Fernando Balbuena al llau de Carlón Callón de la Mesa Pola Normalización Lingüística de Galicia pa debatir alrodiu de “As normalizacións pendentes en Galiza e Asturias”. Pal mesmu día taba programáu el debate “Estandarización e normalización das falas do Eo-Navia” nel que diba participar l’asturianu Xosé Miguel Suárez, miembru de l’asociación Xeira, al llau de Carlos Varela, presidente d’Abertal y representante de l’Academia Galega na tierra de Navia-Eo. A la fin, según pudo saber esti mediu, nin Balbuena nin Suárez van tar presentes.

La representación asturiana nes xornaes de Ribadeo queda asina reducida a la participación del escritor Xuan Bello, el profesor de la Universidá d’Uviéu, Xulio Viejo y el responsable de la Oficina de Política Llingüística del Principáu, Ramón d’Andrés. Bello va abrir les xornaes con una conferencia titulada “Historia de dos hermanes y un llobu”, presentáu pol caderalgu de la Universidá de Santiago Francisco Fernández Rei. El profesor Viejo falará de la situación del asturianu na Universidá d’Uviéu y el xefe de la Oficina de Política Llingüística va tratar de les virtúes y deficiencies del actual Plan de Normalización Social de la Llingua Asturiana.

Les xornaes de la I Escola Permanente Fermín Penzol van celebrase del 28 al 30 d’ochobre nel Auditoriu Municipal de Ribadeo y tan organizaes pola Vicerrectoría de Relaciones Esteriores de la Universidá de Vigo y col sofitu del conceyu agospiador.