“Willy Wonka”, Gene Wilder, muerre a los 83 años

L’actor Gene Wilder, una de les figures más representatives de la comedia norteamericana, finó esti llunes a los 83 años na so casa de Stamford nel estáu de Connecticut, según confirmó’l so sobrín Jordan Walker-Pearlman al mediu especializáu Variety.

Wilder, que se dio a conocer nel mundu del teatru, protagonizó comedies como Los productores (1967) o El mocín Frankenstein (1974). La so interpretación de “Willy Wonka n’Un mundu de fantasía” y les sos collaboraciones con Mel Brooks marcaron una dómina del cine popular de los años 70. L’actor, que finó por entueyos derivaos del alzheimer que carecía, foi tamién director, productor y guionista, anque debutó como actor cinematográficu bien alloñáu de les comedies, cola película de cultu Bonnie & Clyde (1967).

Amás de les sos collaboraciones con Brooks, Wilder tamién formó una xenial asociación col tamién actor y comediante Richard Pryor, col que compartió grandes ésitos como L’espresu de Chicago (1976) o Nun me glayes, que non te veo (1989).

Como director, Gene Wilder debutó con “L’hermanu más llistu de Sherlock Holmes” (1975), una parodia del clásicu de Sir Arthur Conan Doyle, y tocó el cielu con “La muyer de collorao” (1984), col que llegó a ganar un Oscar a la meyor banda sonora. En 1999 retiróse definitivamente del mundu de la interpretación.