Italia va regalar 500 euros a los mozos de 18 años pa gastar en cultura

Los mozos italianos y residentes llegales n’Italia qu’algamen la mayoría d’edá mientres 2016 van recibir a partir del próximu 15 de setiembre del Gobiernu un bonu de 500 euros pa gastar en productos y eventos culturales hasta’l 31 d’avientu de 2017.

La midida, de la que se van beneficiar unos 574.593 mozos, va tener un costu averáu de 290 millones d’euros pa les arques públiques del país tresalpín. Pa disponer del bonu de 500 euros, los mozos nacíos en 1998 tendrán de rexistrase na webwww.18app.it y descargase nos sos teléfonos móviles l’aplicación 18app.

Los mozos qu’algamen la mayoría d’edá anguaño van poder destinar los 500 euros del bonu cultural a mercar llibros, entraes pal cine, el teatru o asistir a esposiciones, museos o conciertos, anque nun van poder gastar el dineru en música. Nesti sentíu, el presidente de la Federación de la Industria Musical d’Italia (FIMI), Enzo Mazza, denuncia al traviés d’un artículu publicáu na versión italiana del Huffington Post que’l bonu cultural del Gobiernu “discrimina” al sector de la música al dexar fuera la compra de discos y cantares tantu en formatos físicos como dixital.