Vicente Gotor convirtióse ayeri nel primer Rector de la Universidá d’Uviéu qu’echa un discursu oficial n’asturianu

Cuatrocientos años tuvieron que pasar pa qu’un Rector de la Universidá d’Uviéu echara un discursu oficial na llingua d’Asturies. Foi nel actu d’entrega de diplomes de los Cursos de Branu de l’ALLA. Vicente Gotor, escoyíu nel mes de mayu como máximu mandatariu de la universidá asturiana espresó amás, la so voluntá de “buscar el consensu” p’atopar “una solución a la llingua ente los estudios reglaos” de la Facultá de Filoloxía, afitando lo dicho estos díes pol decanu en funciones d’esta facultá.

Xunto al Rector, presidieron l’actu la directora de l’Academia de la Llingua Asturiana y ex decana de Filoloxía, Ana CAno, el director de los cursos, Xoxé Antón González Riaño, y el secretariu de los mesmos, Pablo Xuan Manzano.

Gotor espresó tamién la so “voluntá pa que la llingua y la cultura asturiana tengan el so llugar académicu y científicu na Universidá” dexando claro que les sos declaraciones conllevaben un “compromisu” sobre “los estudios reglaos d’asturianu qu’hasta agora nun s’establecieron na Universidá”.

La presidenta de l’Academia agradeció al rector la so “collaboración” cola entidá, asina como’l fechu de que se dirixere al públicu n’asturianu y que lo ficiere nun espaciu como’l paraninfu.

Gotor anunció tamién nel actu, como yá ficiere n’otres ocasiones, que próximamente la páxina de la Universidá d’Uviéu va tener la so versión en llingua asturiana, llabor nel que yá tán trabayando los técnicos de l’Academia.