Uviéu prepárase pa la resaca d’once díes de folixa na xornada grande de Samatéu

Bollu y vinu contra l’amenacia persistente d’orbayu. Miles d’uvieínos participen dende esti mediudía na romería cola que la ciudá cellebra, nel Campu San Franciscu, el día grande de les fiestes patronales de Samatéu, una xornada que pesllarán un conciertu d’El Canto del Loco nes pistes de San Llázaru y un recital de música llatina na Plaza la Catedral.

Depués d’una mañana marcada pola distribución del bollu y el vinu y la cellebración d’una misa mayor na Catedral, el programa festivu de Samatéu prevé pa esta tarde una corrida de toros na plaza de Buenavista y un pieslle musical desdobláu en dos escenarios.

Na Plaza la Catedral, una nueche llatina contará a partir de les 21,30 hores cola participación de Sonia Fausto, Los Charros de Jalisco y Hedí Mc Lean. Dos hores depués, nel complexu municipal de San Llázaru, los integrantes del grupu madrilanu El Canto del Loco actuarán na ciudá nel que sedrá’l so regresu a Uviéu depués de participar, hai un añu, n’anterior edición de les fiestes de Samatéu con un concurríu conciertu na plaza de Buenavista.

Les fiestes patronales d’Uviéu entamaron el pasáu 10 de setiembre y camudaron la fisonomía’l cascu vieyu de la capital, onde s’allugaron los habituales puestos hosteleros de cai. A lo llargo d’once díes de folixa, polos escenarios de la ciudá pasaron, ente otros, Café Quijano, Fran Perea, Estopa, O’Funkillo, Mala Rodríguez, Malú, Hevia, Felpeyu y Chus Pedro Suárez.